Калі Алена Валковіч звярнулася ў нашую праграму першы раз, яна была цяжарная шостым дзіцём, а ейны муж быў збіты і арыштаваны. Аднак нашыя гледачы не пакінулі шматдзетную сям’ю сам-насам з праблемамі.
З таго часу мінула больш чым паўгода, Алена з мужам шмат разоў сутыкнуліся з абыякавасцю і дробнай помстай чыноўнікаў. Муж стаў зарабляць нашмат менш, а Алене, якая працуе фатографам у школах, сталі ўсё часцей адмаўляць у замовах. І падтрымка зусім незнаёмых людзей – гэта тое, што дапамагае сям’і верыць у дабро і справядлівасць.
Папярэдняе выданне пра Алену і ейную сям’ю:
Ужо шмат месяцаў гэтую сям’ю падтрымліваюць сумленныя беларусы, гледачы нашай праграмы. Дзіцячыя кнігі, цацкі або бытавая тэхніка – людзі спрабуюць дапамагчы ў меру сваіх сілаў. Алена з мужам не называюць імёнаў тых, хто спрабуе палегчыць ім жыццё, але запэўніваюць, што ведаюць і памятаюць кожнага чалавека.
«Нам падарылі нават робат-пыласос пасля праграмы! Некаторыя дапамагаюць на рэгулярнай аснове. З апошняга – пасылка з Краснаярску. Дзе мы, а дзе Краснаярск, але падтрымка аб’ядноўвае людзей нават на такой вялікай адлегласці, – дзеліцца сям’я.
Дапамога, якая прыходзіць з самых розных месцаў, гэтую сям’ю ўжо не здзіўляе. Сумленныя людзі лёгка адгукаюцца на чужы боль, асабліва калі самі ведаюць, якою бязлітаснаю можа быць улада.
Калі вы хочаце падтрымаць іншых нашых герояў (гэта можна зрабіць як публічна, так і ананімна з любога пункту свету), лістуйце нам: belarus2belarus@gmail.com
І памятайце: беларус беларусу – любоў, падтрымка і перамога.