Расея – крэдытор апошняй інстанцыі не толькі для дзяржавы, але і для беларускіх камерцыйных банкаў. Як санкцыі паўплываюць на банкаўскую сістэму, высвятляем у праграме «Эканоміка з Чалым».
Беларусы пачалі выносіць з банкаў свае дэпазіты. Як на ўвесь гэты працэс паўплывалі санкцыі? Тлумачыць эканаміст Сяргей Чалы:
«З аднаго боку, валютная пазіцыя камерцыйных банкаў пагаршаецца за кошт таго, што насельніцтва выносіць дэпазітныя пасівы. З іншага боку, магчымасць традыцыйнага каналу недзе за мяжой атрымліваць гэтыя грошы, у сувязі з санкцыйныя ціскам, таксама моцна абмяжоўваецца. Прычым менавіта фінансавыя санкцыі, з майго пункту гледжання, значна больш важныя, чым сектаральныя па прадпрыемствах. Бо яны працуюць наўпрост і ўплываюць на сэрца эканомікі».
Гэта азначае, што праз санкцыі банкі амаль губляюць здольнасць крэдытавацца і перакрэдытоўвацца. І не трэба забываць, што рэсурсная база банкаў уплывае на іх устойлівасць і магчымасць крэдытаваць рэальны сектар эканомікі.
«Ёсць ужо інфармацыя, хаця пакуль яна не моцна пацверджаная, што «Deutsche Bank» мае намер закрыць у «Беларусбанку» карэспандэнцкія рахункі ў доларах, еўрах, фунтах. Значыцца, сітуацыя такая, што спіс банкаў-карэспандэнтаў, з якімі працуюць беларускія банкі, даволі моцна скарачаецца. Там усё менш сур’ёзных сусветных банкаў і ўсё больш нейкіх дзіўных расейскіх банкаў», – дадае адмыслоўца.
Буйным банкам ужо не цікава сачыць кожны дзень за зменаю санкцыяў і рызыкаваць істотнымі стратамі.
Таксама ў праграме «Эканоміка з Чалым»:
- Па кім бʼе кепскі ўраджай?
- Што стымулюе рынак нерухомасці?
- Замест пшаніцы расце інфляцыя
