Былыя акторы Тэатру імя Янкі Купалы адзначылі старажытнае беларускае свята ў містычнай атмасферы.
Купалле – адно з самых прадаўніх, магічных і загадкавых беларускіх святаў. У старажытнасці Купалле прымяркоўвалася да летняга сонцастаяння. Купальская ноч – самая кароткая ў годзе. Сімвалічна яна яднае мужчынскі і жаночы пачаткі, спалучае дзве несумяшчальныя стыхіі – агню і вады.
Класік беларускай літаратуры Янка Купала ўзяў свой псеўданім менавіта ад гэтага свята, звязанага з росквітам прыроды і летняй цеплыні.
Імя Янкі Купалы носіць Нацыянальны акадэмічны тэатр, з якога ў жніўні 2020 года звольніліся 58 супрацоўнікаў на знак салідарнасці з беларускім народам, які выйшаў на мірныя пратэсты супраць гвалту і беззаконня ў краіне.
Былыя прадстаўнікі тэатру заснавалі незалежную тэатральную групу і сталі называцца «Свабоднымі купалаўцамі».
«Свабодныя купалаўцы» разам з тэлеканалам «Белсат» творча пераасэнсоўваюць літаратурную класіку ў праекце «Вершы».