29 лістапада ва ўсёй нашай краіне адбываўся мірны Марш суседзяў. Выходзілі раёны і ў Жодзіне. Сярод удзельнікаў маршу быў Станіслаў Рэпкін, цяпер ужо былы інжынер БелАЗу.
«Мы сустрэліся з хлопцамі каля банку. Прайшліся па вуліцы, спыніліся ля прыступак літаральна на 10-15 хвілінаў, пагутарылі. Ніякіх воклічаў, ніякіх сцягоў, нічога падобнага не было».
Раптам пачаўся хапун, людзей забіралі без разбору. Сілавікі затрымалі амаль усіх хлопцаў, а таксама дзяўчат, якія кінуліся за імі, каб даведацца, што здарылася. Схапілі і нашага героя.
Праз 72 гадзіны Станіслава Рэпкіна выпусцілі з пратаколам, складзеным паводле народнага артыкулу – 23.34 КаАП. 3 снежня хлопец выйшаў на працу – на БелАЗ.
«Праз гэтую адсутнасць мяне пакаралі пазбаўленнем выплатаў за бесперапынны працоўны стаж, дэпрэміявалі за лістапад на 100 адсоткаў, пазбавілі матэрыяльнае дапамогі за адпачынак і гэтак званых паўгадавых за агульны вынік працы за год. Агулам гэта склала каля траціны заробку. Магчыма, і больш».
Гэтую вымову наш герой пастанавіў абскардзіць, таму звярнуўся ў заводскую канцылярыю па копію пастановы.
«Працоўная змена пачынаецца а 07:30. Я зайшоў у канцылярыю недзе каля 07:28. Там падаў дакументы. У сваім працоўным кабінеце я быў а 07:37».
Вось за гэтыя 7 хвілінаў адсутнасці на працоўным месцы Станіславу Рэпкіну выпісалі другую вымову.
«У рэшце рэшт мяне звольнілі паводле артыкулу. 13 студзеня 2021 года, – кажа былы інжынер вытворчага гіганту. – Звольнены за невыкананне без важкіх прычынаў працоўных абавязкаў. Як працаўнік, у якога ёсць непагашаныя дысцыплінарныя спагнанні. Артыкул 42.6 Працоўнага кодэксу РБ».
Бараніць свае правы Станіслаў Рэпкін пайшоў у суд. Агулам адбылося сем судовых паседжанняў, пасля пятага прадстаўнікі БелАЗу зразумелі, што прайграюць суд, і прапанавалі Станіславу міравое пагадненне. З прадпрыемства хлопцу пазванілі толькі праз месяц, за пару дзён да аднаўлення суда.
«Занатавалі мае ўмовы – што я магу разгледзець кампенсацыю замест аднаўлення на працы і адмовіцца ад маральнае школы, калі мы пойдзем на міравое пагадненне».
Толькі на судзе Станіслаў даведаўся, што ягоных умоваў замірэння не прынялі.
Суддзя ж палічыў дзеянні БелАЗу законнымі. Наш герой бачыць у гэтым адную прычыну.
«Папросту 25 сакавіка мінула, і людзі, сілавікі, суддзі разняволіліся».
Ігар Комлік, рэгіянальны прадстаўнік прафсаюзу РЭП, у такіх выпадках раіць звяртацца па дапамогу ў незалежныя прафсаюзы і несці пазоў у суд.
«Прайсці гэтую лесвіцу трэба. Таму што ўсё ж такі ў судовай сістэме ёсць асобы, якія прафесійна ставяцца да свайго абавязку, і можна знайсці абарону. Ну, а калі не… Гэта пакажа карціну таго, што цяпер адбываецца, і зробіць зачын на тое, што ў рэшце рэшт справа будзе перагледжаная, калі ў краіне будзе адноўленая прававая сістэма».
Рэальную прычыну звальнення Станіслаў Рэпкін, былы інжынер БелАЗу, бачыць у сваёй актыўнай грамадзянскай пазіцыі.
«Я збіраў подпісы ў абарону пацярпелых працаўнікоў БелАЗу. Таксама мяне затрымлівалі паводле артыкулу 23.34. Таму за мною быў кантроль. Ну, адпаведна, БелАЗ пастанавіў пазбавіцца ад непажаданага працаўніка».
Калі раней Станіслаў хацеў аднавіцца на працы, то цяпер жадае проста дамагчыся справядлівасці.
«Хаджу на сумоўі, спрабую ўладкавацца ў жыцці. Але не забываюся на гэтую сітуацыю, усё роўна буду падаваць на абскарджанне ў суды».
Таксама ў праграме «Маю права»:
- Пракуроры зацікавіліся моўнымі курсамі
- Адмыслоўца – пра нацменшасці ў Беларусі
- Аднаго сына пакаралі смерцю, другога – забралі з вуліцы
Праваабарончую праграму «Маю права» глядзіце кожную пятніцу а 19:05 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы» на нашай старонцы.
