Нашыя гледачы забяспечылі рэабілітацыю для ўнука Рыгора Кастусёва. У хлопчыка ДЦП. Цяпер ягоныя бацькі, палітычныя бежанцы, хочуць дапамагчы іншым сем’ям разабрацца ў тым, як атрымаць дапамогу для іхных дзяцей з інваліднасцю.
Палітыка Рыгора Кастусёва арыштавалі, абвінаваціўшы ў спробе дзяржперавароту. Дачка Галіна, зяць Зміцер і чацвёра ўнукаў былі вымушаныя з’ехаць ад палітычнага пераследу ў Беласток. Маленькаму ўнуку Антосю была неабходная рэабілітацыя ДЦП.
Нашыя гледачы адгукнуліся – і сабралі сродкі, якіх хапіла не толькі на рэабілітацыю…
У спадара Рыгора рак. Яго трымаюць у «Амерыканцы», дзе сяк-так спрабуюць лекаваць. Ён знаёміцца з матэрыяламі справы. Яму ўжо выставілі канчатковае абвінавачанне, але сям’я не ведае артыкулаў. Ён абыходзіць гэтую справу ў лістах, і адвакатка таксама нічога не кажа.
Пра стан здароўя спадар Рыгор піша, што тыя ўколы, якія перадала яму сям’я, дапамагаюць. Стан палепшыўся. Вядома, анкалогія нікуды не падзелася, але самаадчуванне і агульны стан – больш стабільныя.
Праз пераезд у Антося атрымаўся доўгі перыяд без рэабілітацыі. У Беластоку знайшліся беларусы, якія ўзялі на сябе кошт курсу масажу і курсу ЛФК у прыватным цэнтры.
Таксама ў нашую праграму звярнуўся пан Ежы, былы гарадзенец, які даўно жыве ў Польшчы. Ён пералічыў сродкі на арганізацыю, праз якую надаецца дапамога Антосю.
Асобным цудам стала фінансавая падтрымка ад гледача Мікіты. Гэтыя сродкі сям’я выкарыстае не толькі на рэабілітацыю, але і каб купіць камп’ютар, які так неабходны дзецям для заняткаў, перадусім Антосю.
«Безумоўна, вялікі дзякуй людзям за тое, што дапамагаюць. Мы, калі станем на ногі, таксама будзем дапамагаць, таму што мы адчуваем, што ў беларусаў ёсць патрэба, каб дапамагалі. Каб мы тут, у чужой краіне, не заставаліся сам-насам са сваімі праблемамі», – кажа Зміцер.
Нашыя героі хочуць стварыць ініцыятыву для сем’яў з дзецьмі з інваліднасцю, каб дапамагчы ім разабрацца ў польскай сістэме аховы здароўя. Як і што рэгістраваць. Як атрымаць неабходныя паперы. Куды звяртацца.
У вашай сям’і ёсць дзіця з інваліднасцю? Вы хочаце ці мусіце з’ехаць з Беларусі? Звяртайцеся да нас за кансультацыяй. Мы скантактуем вас са Змітром.
Вялікая радасць, калі ў выніку ўсё атрымліваецца. І, бачыце, сям’я Змітра і Галіны, дачкі Рыгора Кастусёва, падымаецца паціху на ногі. У выніку яны самі гатовыя дапамагаць рэпрэсаваным сем’ям з дзецьмі з інваліднасцю.
І вельмі цешыць, што дабро вяртаецца, беларуская салідарнасць працуе, і ўсё гэта дзякуючы вам, дзякуючы нам з вамі.
Калі б вы хоць нечым маглі дапамагчы нашым героям, лістуйце нам: belarus2belarus@gmail.com
Гэта можна зрабіць з любога пункту свету. Публічна ці ананімна.
Далучайцеся да нашых суполак у Facebook ды Instagram.
І памятайце: беларус беларусу – любоў, падтрымка і перамога. Дзе мы разам – там і Беларусь!
Праграму «Беларус беларусу» глядзіце кожную пятніцу на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы» на нашай старонцы.