Герой гэтага выдання «Ваяроў» – беларускі добраахвотнік з пазыўным Баксёр – быў актыўным удзельнікам пратэстаў 2020 года ў Беларусі. 10 жніўня яго затрымалі і збілі супрацоўнікі АМАПу. Праз рэпрэсіі ды палітычна матываваны пераслед хлопец з’ехаў у Літву. З пачаткам расейскай агрэсіі далучыўся да шэрагаў добраахвотнікаў палка Каліноўскага.
Цяпер Баксёр у Літве, куды паехаў развязваць праблемы са здароўем, што абвастрыліся пасля баявога задання. У тым баі, пры абароне вёскі, ваярам даводзілася часта мяняць пазіцыі, шмат часу быць у акопах:
«Пасля баявога задання ў мяне ўзніклі праблемы са здароўем. Пасля арыштаў і збіцця ў 2020 годзе ў мяне была язва, яна абвастрылася. І яшчэ праблема з ныркамі. Я фізічна не зусім добра сябе адчуваў і прыехаў проста развязаць праблемы са здароўем ды вярнуцца ва Украіну. Гэта значыць, я еду, лячуся – і вяртаюся назад ва Украіну ў склад палка».
Але нават цяпер, у Літве, наш герой дапамагае рыхтаваць беларусаў, якія ў 2020–2021 гадах пакінулі Беларусь: дзеліцца сваім досведам, тлумачыць азы валодання зброяй, вучыць тактыцы вядзення баёў.
Баксёр выказаў сваё стаўленне да прапагандысцкіх фэйкаў ды зняпраўдзіў іх:
«Нейкія пайшлі чуткі, што полк развальваецца, нібыта нейкія міжусобныя праблемы там зʼявіліся, але гэта ўсё прапагандысцкая хлусня. Тое, што загінула палова палка, – гэта трызненне варʼята. Чатыры чалавекі загінулі, так, гэта факт, а астатнія працягваюць ваяваць, трэнавацца, набіраць навабранцаў. Усё працуе, усё выдатна».
Канчатковая мэта беларускіх добраахвотнікаў – вызваліць Беларусь, менавіта таму яны ехалі ва Украіну: атрымаць ваенны досвед, максімальна ўзяць удзел у баявых дзеяннях.
«Вайна для мяне скончыцца, калі мы вызвалім Беларусь, правядзём дэмакратычныя выбары. Беларусь станецца свабоднаю краінаю», – кажа ваяр.
Падрабязней пра жыццё на фронце, загінулых сяброў ды баі з акупацыйнымі войскамі глядзіце ў новым выданні праграмы «Ваяры».
