Беларус ледзь не забіў тых, хто яго катаваў


Беларускі добраахвотнік з пазыўным Ліс да службы ва ўкраінскім войску партызаніў у Беларусі. Сілавікі Лукашэнкі схапілі яго і катавалі, але нават тады ён здолеў даць ім адпор. Паглядзіце ягоную гісторыю ў праграме «Маю права».

Ліс не раскрыў свайго імя і прозвішча, бо ўсе сілы рэжыму Лукашэнкі накіраваныя на высвятленне асоб, якія ваююць у шэрагах добраахвотнікаў на баку Украіны.

У Беларусі Ліс быў актыўным удзельнікам пратэстаў супраць сфальсіфікаваных выбараў. Калі дэманстрацыі былі здушаныя, займаўся партызанскімі акцыямі. Хлопца неаднаразова затрымлівалі, прыцягвалі ў якасці падазраванага ў палітычных крымінальных справах, неаднаразова судзілі ў адміністратыўных справах. 40 содняў ён правёў у ізалятары, зазнаў катаванні, збіццё і спробу згвалтавання.

«Закінулі мяне ў ІЧУ ў «прэсхату», у якой мяне спрабавалі згвалтаваць. Але я даў годны адпор, там я прабыў не больш за 30 секундаў. Адтуль мяне за рукі выцягнулі самі ж супрацоўнікі міліцыі, якія мяне туды завялі, бо тых пачвараў, якія спрабавалі мяне прынізіць, я б забіў», – расказвае наш герой.

Улетку 2021 года Ліс нелегальна перайшоў мяжу і пачаў новае жыццё ў Літве.

Мaю прaвa
Беларускага добраахвотніка хацелі аддаць у Беларусь. СБУ распачало справу па факце дзяржаўнае здрады
2022.04.23 11:00

Эксперт нашай праграмы праваабаронец Алег Агееў адзначыў, што дзеянні сілавікоў у дачыненні нашага героя, безумоўна, расцэньваюцца як катаванні. Факты такіх злачынстваў фіксуюцца не толькі беларускімі праваабаронцамі, але і міжнароднымі прававымі арганізацыямі ў межах расследавання справаў ва ўніверсальнай юрысдыкцыі ў шэрагу краінаў.

Паводле беларускага Крымінальнага кодэксу, за катаванні прадугледжаная адказнасць аж да смяротнага пакарання, гэтыя злачынствы не маюць тэрміну даўніны. Таму тыя, хто выконвае загад аб катаваннях, і тыя, хто аддае такія загады, будуць прыцягнутыя да адказнасці ў любым выпадку.

Мaю прaвa
«Я быў супраць сілавога рашэння». Гісторыя беларуса з батальёну Каліноўскага
2022.04.15 11:00

Ліс пачаў вайну пад Мікалаевым, на першай лініі абароны. Тады расейцы кінулі ў бой вялікія сілы. Яны адчувалі сябе гаспадарамі ў небе, бо ўкраінская авіяцыя ў той час амаль уся была пад Кіевам. Брыгада Ліса тады апынулася ў атачэнні, але нанесла ворагу вялікія страты і прарвалася да сваіх.

Зараз расейцы адышлі ад Мікалаева, але працягнулі абстрэл гораду. Б’юць не па вайсковых аб’ектах – б’юць па цывільнай інфраструктуры.

«Ідзе вайна на знішчэнне ўкраінскай нацыі. Я на свае вочы неаднаразова бачыў трупы цывільных украінцаў. На маіх вачах падчас бою стралялі па цывільных, расстрэльвалі машыны. І па іх білі мэтанакіравана», – распавядае Ліс.

Беларус ваюе на баку Украіны, бо лічыць украінцаў братамі, а Расею – агульным ворагам Украіны і Беларусі. Наш герой лічыць, што адзіны шлях вызвалення Беларусі – гэта ўзброеная партызанская барацьба. Хлопец перадае прывітанні «сваім суайчыннікам, батальёну імя Каліноўскага, усім ваярам, якія там змагаюцца і змагаюцца ў іншых падраздзелах ЗСУ, тым партызанам, якія зараз змагаюцца ў Беларусі».

«Усё будзе Беларусь! Жыве Беларусь! Расейская імперыя будзе знішчаная!» – упэўнены Ліс.

Праваабарончую праграму «Маю права» глядзіце кожную пятніцу а 18:10 на тэлеканале «Белсат» праз спадарожнік «Астра 4A» (ранейшая назва «Sirius 4»), онлайн, на YouTube-канале «Белсат Life» або ў закладцы «Праграмы»на нашай старонцы.

Калаж з фота: president.gov.ua