Прэзідэнт Украіны Уладзімір Зяленскі перападпісаў закон аб адмысловым статусе Данбасу. Дзеянне закона падоўжылася яшчэ на год, да 31 снежня 2020-га. Іншых змяненняў у закон не ўнесена.
Закон «Аб асаблівым парадку мясцовага самакіравання ў асобных раёнах Данецкай і Луганскай вобласцяў» быў прыняты ў 2014 годзе. Ён дзейнічае на часовай аснове і патрабуе штогадовага падаўжэння парламентам.
Закон прадугледжвае амністыю для ўдзельнікаў падзеяў у Данбасе, магчымасць выкарыстоўваць рускую мову ў органах мясцовага самакіравання, удзел мясцовых уладаў у прызначэнні кіраўнікоў органаў пракуратуры і судоў, а таксама асаблівую дзяржаўную падтрымку з боку Украіны для аднаўлення прамысловасці і інфраструктуры.
Па рашэнні Вярхоўнай Рады артыкулы закону ўступяць у сілу толькі пасля таго, як расейскія войскі і тэхніка пакінуць непадкантрольныя Кіеву тэрыторыі, а таксама пасля правядзення ў Данбасе пазачарговых выбараў у адпаведнасці з Канстытуцыяй Украіны.
ЮВ/ІР belsat.eu
