Уладзімір Зяленскі падпісаў указ аб наданні грамадзянства 14 замежным добраахвотнікам, якія «удзельнічалі ў абароне тэрытарыяльнай цэласнасці, суверэнітэту і незалежнасці Украіны». Сярод іх два грамадзяніна Беларусі.
Згодна з указам № 466/2019 украінскія пашпарты атрымаюць : Дзмітрый Белагорцаў (беларус), Давыд Гачэчыладзэ, Абдул Джаліл, Тачы Джафараў, Рудольф Егарэнка (беларус з Гомля), Тэнгіз Занадзэ, Гіоргій Кахніяшвілі, Валерый Колат, Мераба Канцэлідзэ, Мамука Музашвілі, Юрый Савілаў і Леван Хуцышвілі.
Арсланбек Карымаў і Юлія Талап атрымаюць грамадзянства ў якасці «асобаў, якія маюць значныя заслугі перад Украінай».
Нагадаем, што Вярхоўная Рада Украіны 6 чэрвеня прыняла закон, які спрашчае выдачу ўкраінскіх пашпартоў замежным добраахвотнікам.
Прэс-служба кіраўніка Украіны адзначае, што іншыя замежныя добраахвотнікі змогуць атрымаць грамадзянства пасля разгляду дакументаў у Міграцыйнай службе. У паведамленні на сайце прэзідэнта Украіны таксама гаворыцца, што працэдура надання грамадзянства будзе аператыўнаю.
Некалькі тыдняў таму беларусы, якія ваявалі на Данбасе, звярнуліся да Уладзіміра Зяленскага з патрабаваннем надаць ім грамадзянства Украіны.
Паводле інфармацыі Belsat.eu, у баявых дзеяннях на Данбасе на баку Украіны бралі ўдзел ад 200 да 500 беларусаў.
ЮВ belsat.eu
