Прэзідэнт Украіны Уладзімір Зяленскі хацеў бы, каб у Беларусі трансляваліся некалькі ўкраінскіх тэлеканалаў. Пра гэта ён заявіў падчас прэс-марафону 10 кастрычніка, адказваючы на пытанне карэспандэнткі «Белсату» Адэлі Дубавец.
«Я вельмі хачу, каб людзі, якія жывуць у Беларусі, не мелі інфармацыйнага вакууму наконт таго, што адбываецца ва Украіне, мелі іншы погляд. Я разумею, трансляцыя якіх каналаў ідзе ў Беларусі, бо я шмат разоў быў у Менску і бачыў, якія каналы там транслююцца», – заявіў украінскі прэзідэнт.
Ён адзначыў, што хацеў прапанаваць кіраўніку Беларусі запуск перадусім забаўляльных каналаў, але, паводле яго, Аляксандр Лукашэнка пагадзіўся і на трансляцыю тых, што асвятляюць палітычныя тэмы.
Уладзімір Зяленскі мяркуе, што на беларускі рынак маюць выйсці перадусім самыя рэйтынгавыя каналы, дзе «ёсць якасны прадукт – якасныя серыялы, якасныя праграмы, якасныя навіны».
У лютым 2019 года ў Беларусі пачаліся трансляцыі ўкраінскага дзяржаўнага каналу «UA TV». Пакуль гэта адзін тэлеканал з Украіны, які транслюецца на беларускую тэрыторыю.
Нагадаем, 10 кастрычніка ў Кіеве Зяленскі даваў вялікі прэс-марафон, падчас якога мусіў адказаць на пытанні 300 журналістаў. Прэсавая канферэнцыя доўжылася болей за 14 гадзінаў.
МГ belsat.eu
