Уладзімір Зяленскі 5 жніўня правёў тэлефонную размову з кіраўніком Беларусі Аляксандрам Лукашэнкам, паведамілі ў прэс-службе ўкраінскага прэзідэнта.
Кіраўнікі дзяржаў падрабязна абмеркавалі пытанні, звязаныя з затрыманнем у Беларусі баевікоў прыватнай ваеннай кампаніі Вагнэра. Была адзначана важнасць далейшай эфектыўнай супрацы паміж кампетэнтнымі органамі дзвюх дзяржаў, у прыватнасці ў кантэксце перадачы ва Украіну асоб, якія падазраюцца ў тэрарыстычнай дзейнасці на яе тэрыторыі.
Уладзімір Зеленскі выказаў перакананне, што ўдзельнікі акцый незаконных груп на Данбасе будуць перададзеныя Кіеву для прыцягнення да крымінальнай адказнасці.
Аляксандр Лукашэнка ў сваю чаргу адзначыў, што праваахоўныя органы будуць супрацоўнічаць па гэтым пытанні ў рамках падпісаных з Расеяй і Украінай міжнародных пагадненняў, паведамілі ў адміністрацыі кіраўніка Беларусі.
Таксама бакі абмеркавалі падрыхтоўкі да Трэцяга форуму рэгіёнаў Украіны і Беларусі, які пройдзе восенню ў Горадні. Апроч таго, Зеленскі выказаў асабістую падзяку Лукашэнку за гуманітарную дапамогу.
Яны таксама абмеркавалі сітуацыю з распаўсюдам каронавірусу і ўзмацненне памежнага кантролю на беларуска-ўкраінскай мяжы і актывізацыю ўзаемадзеяння паміж памежнымі ведамствамі.
МГ belsat.eu
