Злучаныя Штаты Амерыкі ратыфікавалі пратакол да дамовы пра NATO ад 1949 года, ухваліўшы далучэнне Паўночнай Македоніі да Паўночнаатлантычнага альянсу.
«Рады паведаміць, што ЗША ратыфікавалі пратакол аб уступленні Паўночнай Македоніі ў NATO. На адзін крок бліжэй да таго, каб прыняць Паўночную Македонію ў якасці 30-га саюзніка па NATO», – паведаміў дзяржаўны сакратар ЗША Майкл Пампэёў у Twitter.
Раней амерыканскі сенат прагаласаваў за прыняцце пратаколу.
Уступу Македоніі ў NATO перашкаджала суседняя Грэцыя. Грэкі не пагаджаліся, што гэтая дзяржава выкарыстоўвае назву, якой Афіны называюць адну са сваіх правінцыяў. Яны таксама баяліся, што Скоп’е выступіць да іх з тэрытарыяльнымі прэтэнзіямі.
Але сёлета ў студзені парламент Грэцыі ратыфікаваў пагадненне з Македоніяй, паводле якога краіна будзе называцца Паўночная Македонія. Тым самым быў адкрыты шлях Скоп’е на еўрапейскую ды паўночнаатлантычную інтэграцыю.
МГ belsat.eu
