У снежні адбудзецца чарговы рост коштаў на мабільную сувязь, цыгарэты. Акрамя таго змены закрануць і камунікацыі: з’явяцца новыя цягнікі, а кіроўцам варта памятаць пра тое, што прыйшоў час паставіць зімовыя апоны.
Найбуйнейшы аператар мабільнай сувязі A1 з 1 снежня змяняе ўмовы абслугоўвання фізічных і юрыдычных асобаў па некаторых тарыфных планах, піша Myfin.by. Перадусім змены закрануць кошт абаненцкай платы, якая вырасце.
Паводле Міністэрства па падатках і зборах, з 1 снежня вырастуць кошты на тытунёвыя вырабы. Павышэнне коштаў на некаторыя маркі цыгарэт складзе ў сярэднім ад 1 да 10 капеек.
У снежні заканчваецца дзеянне пастановы Міністэрства антыманапольнага рэгулявання і гандлю, паводле якога ўсталёўваўся мінімальны кошт на цукар. Улады пастанавілі, што кілаграм цукру павінен каштаваць ад 1.5 рублёў, дзеля змагання з расейскім цукрам, які быў значна танней за беларускі.
Таму ў снежні ўлады могуць або працягнуць дзяржрэгуляванне коштаў на цукар, або адпусціць яго кошт, піша TUT.by.
Згодна з правіламі дарожнага руху з 1 снежня да 1 сакавіка рух на аўтамабілі можа адбывацца толькі на зімовых апонах. Калі кіроўцы не выканаюць гэтае патрабаванне, ДАІ будзе або папярэджваць, або штрафаваць кіроўцаў. Штраф за гэтае парушэнне складае 0,5 базавай велічыні (1 базавая – 25,5 рублёў).
Беларуская чыгунка, супольна з польскімі і чэшскімі перавознікамі, з 15 снежня павялічвае колькасць перасадачных цягнікоў паміж Варшавай, Менскам і Прагай, а таксама Варшавай, Менскам і Масквой.
З паловы снежня ў раскладзе з’явяцца новыя штодзённыя цягнікі Варшава-Берасце (№ 126/125) і Берасце-Менск (№ 726/725), а таксама Прага-Варшава-Берасце (№ 136/137) з магчымасцю перасадкі ў Берасці на цягнік у Маскву (№ 96).
СК belsat.eu