Вядомы журналіст і актор Юрый Жыгамонт агучыў анімаваны фільм пра тысячагадовую гісторыю Гомля. Фільм паўстаў з ініцыятывы сяброў краязнаўчай суполкі «Пошукі старога Гомеля».
«Спадзяемся, што з нашай працы выйдзе добры плён, і калі-небудзь звыклай для Гомля з’явай стане не толькі сувенірны магніцік з партрэтам апошняга гомельскага старасты, але і помнік вызваліцелю Гомля вялікаму князю Альгерду на адной з цэнтральных вуліц. Будзьма рэалістамі, будзьма марыць пра немагчымае!» – адзначае рэжысёр і аўтар фільма Марыя Булавінская.
Над сцэнаром працаваў вядомы гомельскі пісьменнік Сяргей Балахонаў.
Праца над фільмам заняла больш за паўгода. Сярод аўтараў – архітэктар і краязнаўца Сяргей Ляпін, мастак – Філіп Какоша, сцэнарыст-кансультант – гісторык Юры Панкоў.
У 2016 годзе Марыя Булавінская зняла для тэлеканалу «Белсат» рэпартаж «Над сістэмай» пра гамельчука, які стаў ахвяраю сталінскіх рэпрэсіяў, а пасля служыў у МГБ.
ЮВ, belsat.eu
