Журналісту «Белсату» Аляксандру Сідарэўскаму прысудзілі 15 содняў арышту

12 кастрычніка Магілёўскі раённы суд прызнаў журналіста вінаватым паводле ч.3. арт.23.34 КаАП (удзел у несанкцыянаванай акцыі) і прысудзіў яму 15 содняў арышту. У залік Сідарэўскаму пойдуць трое содняў, якія ён адбыў у ізалятары яшчэ да суду.

На разгляд справы Сідарэўскага прыехаў старшыня БАЖ Андрэй Бастунец. На судзе ён пацвердзіў, што Сідарэўскі сапраўды з’яўляецца сябрам арганізацыі і выконвае абавязкі журналіста. Выклікаць прадстаўніка БАЖ прапанаваў суддзя Максім Курпачанка.

Сідарэўскі на судзе заявіў, што прысутнічаў на мірнай акцыі пратэсту ў Магілёве 23 жніўня і 6 верасня ў якасці журналіста «Белсату». У адміністратыўным пратаколе Сідарэўскага так і пазначана: «быў у камізэльцы з надпісам «прэса», вёў відэаздымку, дэманструючы гэта людзям, чым выказваў незадавальненне прэзідэнцкімі выбарамі». На аператыўных здымках, прадстаўленых міліцыяй у суд у якасці доказаў віны Сідарэўскага, ён стаіць з прафесійнай камерай у руках і здымае тое, што адбываецца навокал.

І ўсё ж такі гэтага не хапіла суддзі, каб вярнуць справу Сідарэўскага назад у РАУС на дапрацоўку. Ён палічыў, што Сідарэўскі не мае працоўнай дамовы ні з якім беларускім СМІ, а таксама не мае акрэдытацыі як журналіст тэлеканалу «Белсат», а значыць, з’яўляецца простым удзельнікам акцыі і вінаваты.

Гэта ўжо не першы прысуд журналісту нібыта за ўдзел у мірных акцыях пратэсту ў Магілёве. 13 жніўня Кастрычніцкі суд прызнаў яго ўдзельнікам акцыі, дзе той не прысутнічаў фізічна, і пакараў яго 8 соднямі арышту. Сідарэўскі назваў гэтую справу «цалкам сфальсіфікаванай».

«Гэта пераслед міліцыяй мяне як журналіста. Цяпер міліцыя баіцца журналістаў і нават проста людзей, якія здымаюць фота ці відэа на акцыях пратэсту. Ім такая карцінка не патрэбна», – кажа Аляксандр Сідарэўскі.

Вольга Васільева, belsat.eu

Hавiны