Федэральны суд у ЗША часова вярнуў акрэдытацыю ў Белы дом карэспандэнту CNN Джыму Акоста, якога выключылі з прэзідэнцкага пула пасля сваркі з прэзідэнтам Доналдам Трампам.
«Я хачу падзякаваць калегам, СМІ, якія мяне падтрымалі, і суддзю за ягонае рашэнне. Ну і давайце вернемся да працы«, – сказаў у сваю чаргу сам Акоста.
Слуханні па справе яшчэ не скончаныя. Рашэнне аб неадкладным часовым аднаўленні акрэдытацыі суддзя вынес у самым пачатку паседжання.
***
На мінулым тыдні Белы дом пазбавіў Акосту акрэдытацыі праз спрэчку з Трампам і адмову аддаваць мікрафон па патрабаванні прэзідэнта.
Трамп нярэдка крытыкуе СМІ, і, у прыватнасці, тэлеканал CNN. Ён не раз заяўляў, што тэлекампанія вырабляе «фэйкавыя навіны». На прэс-канферэнцыі 7 лістапада ён параіў Акосце «кіраваць CNN, пакуль сам прэзідэнт кіруе краінай».
KA, belsat.eu, паводле bbc.com
