Заяву аб падмене дакументаў суддзём Следчы камітэт расцаніў як скаргу на прысуд

Жыхарка Лагойску Надзея Сіваева працягвае змагацца супраць мясцовага суддзі са жніўня, і ейная гісторыя нагадвае прававы дэтэктыў.

Спадарыню затрымалі 10 жніўня за ўдзел у масавай акцыі, хоць яна да тае акцыі нават не дайшла: «Мы планавалі збіраць подпісы, каб падаць скаргу ў гарвыканкам на вынікі выбараў. Я рушыла да месца, дзе мы дамовіліся сустрэцца з маёй знаёмай. А потым бачу, што яна сядзіць у аўтобусе. Я падышла да аўтобуса і запытала ў чалавека ў чорным гарнітуры, куды вязуць маю знаёмую. Мне мужчына сказаў заходзіць у аўтобус, каб пра ўсё даведацца. Я і зайшла. Выявілася, што гэтак мяне затрымалі».

Надзея Сіваева. Фота з асабістага архіву

11 жніўня адбыўся суд, Надзеі далі 27 базавых. Пастанову абскардзілі, а Менскі абласны суд адмяніў пастанову мясцовага і вярнуў справу ў Лагойск на дапрацоўванне.

Пасля дапрацоўвання ў Лагойску за справу Надзеі ўзяўся старшыня суда. На першае паседжанне не прыйшлі сведкі. Іх выклікалі, але тыя адмовіліся праз эпідэмію COVID-19. Адвакат хадайнічаў, каб суд заслухаў хоць бы аднаго сведку. Суд перанеслі на тыдзень, але сведкі зноў адмовіліся прыходзіць: «Яны былі такія дзёрзкія ў РУУСе, а на суд не прыйшлі. Бо горад маленькі, мы ўсе іх ведаем».

Адвакат Надзеі зноў прапанаваў адкласці паседжанне да таго часу, калі сведкі будуць больш вольныя, але суддзя пастанавіў выносіць прысуд без іхных паказанняў. «Ён дастаў з шуфляды справу маёй знаёмай, да якой я ішла на сустрэчу, і кажа, што Пятровіч суд пастанавіў даць 27 базавых, таму і мне столькі ж. Што гэта за доказ маёй віны?» – абураецца Надзея.

Пастанову суда адвакату Надзеі не выдалі своечасова – нібы не была гатовая. А калі яна і праваабаронца ўсё ж пабачылі паперы, то адразу пастанавілі змагацца далей: «Мы назбіралі заўвагаў на сем старонак пра тое, што ў пратаколе суда зусім не тое, што было на паседжанні. У нас ёсць аўдыязапіс паседжання. І парушэнні гэткія сур’ёзныя, што, грунтуючыся на іх, можна ўвогуле скасаваць пастанову суддзі».

«Я расцэньваю сітуацыю з тэрмінамі дакументаў як махлярства, а пратакол – як падмену дакументаў», – падкрэсліла нашая суразмоўца.

Дакументы Надзеі ў судзе выдалі пазней за належны тэрмін, таму і абскардзіць пратаколу яна не паспела: «Мы падалі заяву ў Следчы камітэт. Але там нам адказалі, што прысуд суддзі мае разгледзець абласны суд. То бок яны нам адказалі не на заяву пра падмену дакументаў, а як на скаргу на пастанову суда! Не ведаю, наколькі вялікімі літарамі трэба будзе пісаць наступны раз, што гэта не скарга, а заява аб падмене!»

Фота з асабістага архіву Надзеі Сіваевай

Суддзя пагражаў распачаць справу пра паклёп, але пасля заявы ў СК тым самым днём пагадзіўся прыняць заўвагі Надзеі. Спадарыня таксама напісала ў Калегію суддзяў, каб тыя разабраліся з гэткаю працаю калегі: «Хай яны дадуць ацэнку такой сітуацыі, калі СК не здолеў».

Цяпер Надзея чакае паседжання абласнога суда ў сваёй справе.

Марыя Грыц belsat.eu

Hавiны