Затрыманых журналістак «Белсату» і TUT.BY прызналі палітвязнямі

Кацярына Андрэева, Дар’я Чульцова, Кацярына Барысевіч. Калаж: spring96.org

Беларускія праваабаронцы прызналі сёння палітвязнямі 11 чалавек, паведамляе праваабарончы цэнтр «Вясна».

Сярод новых палітвязняў – журналісткі журналісткі «Белсату» Кацярына Андрэева (Бахвалава) і Дар’я Чульцова. Яны сталі фігуранткамі крымінальнай справы аб арганізацыі дзеянняў, якія груба парушаюць грамадскі парадак (арт. 342 КК), пасля прамога эфіру з месца жорсткага разгону сілавікамі дэманстрантаў на «плошчы Пераменаў» у Менску 15 лістапада.

Журналістку «Белсату» Кацярыну Андрэеву этапавалі ў жодзінскую турму

Таксама палітвязнем прызнаная журналістка TUT.BY Кацярына Барысевіч, якую затрымалі 19 лістапада ў сувязі з крымінальнай справай аб нібыта раскрыцці медычнай таямніцы збітага да смерці Рамана Бандарэнкі (ч.3 арт. 178 КК ). Яна прывяла ў артыкуле словы лекара аб адсутнасці ў крыві Рамана алкаголю, што супярэчыла заявам прадстаўнікоў уладаў.

«Пераслед журналістак з боку беларускіх уладаў звязаны з выключна мірным ажыццяўленнем абвінавачанымі свабод, гарантаваных Канстытуцыяй і міжнароднымі нормамі ў галіне правоў чалавека – свабоды выказвання свайго, свабоды слова і права на інфармацыю», – гаворыцца ў заяве праваабаронцаў.

Апроч таго, палітвязнямі прызнаныя Сяргей Крыўчэня, Арцём Мядзведскі, Яўген Курганаў, Дзмітрый Жабуртовіч, якім выставілі абвінавачванні паводле артыкулу 293 КК («Масавыя беспарадкі»), і Мікалай Дзядок, Аляксей Самусенка, Кім Самусенка, Павел Дрозд, якіх вінавацяць паводле арт. 342 КК («Групавыя дзеянні, якія груба парушаюць грамадскі парадак»).

Пад Асіповічамі затрымалі ды збілі анархіста Дзядка. Яго тэлеграм-канал захапілі

Праваабаронцы падкрэсліваюць свабода мірных сходаў гарантаваная артыкулам 21 Міжнароднага Пакта аб грамадзянскіх і палітычных правах, а выступы грамадзянаў насілі стыхійны, самаарганізаваны характар і былі выкліканыя недаверам да вынікаў выбараў прэзідэнта.

У заяве падкрэсліваецца, што сходы грамадзянаў насілі мірны характар і не ўяўлялі пагрозы ні нацыянальнай, ні грамадскай бяспецы, але супраць іх сілавыя ведамствы непрапарцыйна ўжылі фізічную сілу, спецсродкі ды зброю.

Праваабаронцы патрабуюць неадкладна вызваліць усіх палітычных зняволеных, а таксама грамадзянаў, затрыманых у сувязі з рэалізацыяй свабоды мірных сходаў у поствыбарны перыяд і спыніць палітычныя рэпрэсіі ў дачыненні да грамадзянаў краіны.

На гэты момант у Беларусі прызнаныя палітвязнямі 143 чалавекі.

МГ belsat.eu

Hавiны