Міліцыянты блыталіся ў паказаннях, доказаў на відэа не было.
У Горадні адбылося трэцяе судовае паседжанне суда Ленінскага раёну па справе Сяргея Калмыкова. Маладзёна вінавацяць у тым, што 29 траўня, падчас пікету па збору подпісаў за Святлану Ціханоўскую, ён парушаў грамадскі парадак і непадпарадкоўваўся міліцыянтам. Нагадаем, у той дзень былі затрыманыя Сяргей Ціханоўскі (муж Святланы Ціханоўскай, які арганізоўваў пікеты па збору подпісаў за прэтэндэнтку ў кандыдаты) і яшчэ 9 асобаў.
Міліцыянты блыталіся ў паказаннях
Сяргей Калмыкоў, як і папярэднія разы, прыйшоў на суд з сабранымі рэчамі на выпадак адміністратыўнага арышту. Суддзя Ларыса Барэль двойчы адпраўляла справу Калмыкова на дапрацоўку.
«Супрацоўнікі міліцыі спрабуюць мяне агаварыць. Падчас суду яны блыталіся ў паказаннях і ў рапарце былі нестыкоўкі. На тым паседжанні суда казалі адно, на гэтым – іншае. Бачны намер змены паказанняў», – кажа Сяргей Калмыкоў.
Маладзён паводзіў сябе у судзе сябе вельмі ўпэўнена, бараніўся сам. Бачна была добрая падрыхтоўка і з заканадаўчага боку. Хлопец задаваў шмат пытанняў міліцыянтам-сведкам. Яны ж адказвалі дзяжурнымі фразамі на пытанні Сяргея. Суддзя задаволіла хадайніцтвы Сяргея: далучыць да справы відэа тэлеканалу «БТ-1», дзе бачна, што ён не рабіў супрацьпраўных дзеянняў, і дазволіла выклікаць сведкаў, якія знаходзіліся на плошчы Савецкай 29 траўня, калі Калмыкоў быў затрыманы.
На відэа быў доказ невінаватасці
Пасля перапынку суддзя Барэль прысудзіла па арт. 23.4 КаАП РБ (непадпарадкаванне міліцыі) 30 базавых велічынь штрафу – Br 810. Па арт. 17.1 КаАП РБ (дробнае хуліганства) Сяргея прызналі невінаватым.
«Падчас суду я давёў вялікую колькасць доказаў сваёй невінаватасці. Маім галоўным аргументам было відэа, якое пацвярджала, што я не ўдзельнічаў у супрацьпраўных дзеяннях. Бачна дзе я знаходзіўся, як сябе паводзіў. І гэтае відэа абвяргае ўсе паказанні супрацоўнікаў АМАПу, што мяне затрымлівалі», – абураецца Калмыкоў.
Маладзён плануе абскарджваць рашэнне суда.
АК Belsat.eu
