Заробак будаўнікам на БелАЭС паднялі на 27,6%

ВІДЭА

Намеснік міністра энергетыкі Міхаіл Міхадзюк заявіў, што базавы ўзровень заробкаў для будаўнікоў Беларускай АЭС павялічаны на 27,6%.

«Мы сёння разам з дзяржкарпарацыяй «Расатам» на 27,6% паднялі сінхронна базавы ўзровень заробку будаўніча-мантажнага персаналу. Гэта дазваляе пры выкананні нормаў выпрацоўкі мець годную зарплату. Вядома, такі ўзровень – пры ўмове выканання планавых заданняў і нормаў выпрацоўкі, заробак павінен быць зароблены», – адзначыў Міхаіл Міхадзюк.

Рашэнне аб павышэнні было прынята летась у снежні, такія ж падыходы дзейнічаюць і пры збудаванні АЭС у Расеі, удакладніў намеснік міністра.

«У каштарысу закладваўся заробак каля 37 тыс. расейскіх рублёў (больш за 1.280 беларускіх рублёў) у эквіваленце. Пасля павелічэння на 27,6% яна дасягае парадку 47 тыс. расейскіх рублёў (больш за 1.600 рублёў) у эквіваленце. Але гэтую суму мы будзем плаціць і плацім пры выкананні нормаў выпрацоўкі», – растлумачыў ён.

Пры гэтым у асобных беларускіх арганізацыях, якія задзейнічаны пры будынку БелАЭС, заробкі вышэй за гэты ўзровень. У прыклад Міхаіл Міхадзюк прывёў прадпрыемства «Белэлектрамантажналадка», дзе ўзровень заробку ўжо летась даходзіў да Br1700-1800. Разам з тым ёсць арганізацыі, дзе нормы выпрацоўкі ніжэй, адпаведна, і заробак менш.

На БелАЭС цяпер працуюць каля 6 300 чалавек будаўніча-мантажнага персаналу.

ІІ, belsat.eu, паводле БелТА

 

Глядзі таксама
Каментары