Фізічны пуск першага энергаблоку Беларускай АЭС запланаваны на восень 2019 года. Пра гэта 15 красавіка паведаміў намеснік міністра энергетыкі Беларусі Міхаіл Міхадзюк на форуме «Атамэкспа» ў Сочы.
Паводле яго, зараз адбываецца індывідуальнае апрабаванне абсталявання, наступны этап – гідравыпрабаванні, цыркулярная прамыўка, халодная і гарачая абкатка. Пасля гэтага запланаваная рэвізія абсталявання, паведамляе БелТА.
«Калі на стадыі абкатак не будзе сур’ёзных форс-мажораў, восенню мы павінны пайсці на фізічны пуск», – расказаў Міхаіл Міхадзюк.
Адносна завозу на пляцоўку БелАЭС ядзернага паліва, Міхаіл Міхадзюк заявіў, што з гэтым кіраўніцтва станцыі не спяшаецца, каб не абмяжоўваць рэжым працы будаўніча-мантажных арганізацый. Завоз паліва запланаваны за месяц да фізічнага пуску.
МГ belsat.eu