«Занадта шмат эмоцыяў». Лаўроў пракаментаваў магчымасць аб’яднання Беларусі і РФ


Сяргей Лаўроў. Фота - mid.ru

Міністр замежных справаў РФ Сяргей Лаўроў заявіў, што Расея гатовая развіваць інтэграцыю з Беларуссю настолькі, насколькі на гэта гатовы афіцыйны Менск.

Пра гэта ён заявіў, адказваючы на пытанне в’етнамскіх і кітайскіх тэлеканалаў наконт магчымасці абʼяднання Беларусі і Расеі ў адзіную дзяржаву.

«Вакол гэтага пытання занадта шмат эмоцыяў. Журналісты шмат што дадумваюць і дапісваюць. У нас вельмі простая пазіцыя, і яна падзяляецца прэзідэнтам Беларусі А. Р. Лукашэнка. Ёсць дамова аб стварэнні Саюзнай дзяржавы Беларусі і Расеі. У ім выкладзены тыя дамоўленасці, якія былі пакладзены ў аснову Саюзнай дзяржавы. Яны датычацца ўзаемадзеяння ў эканоміцы, фінансах, у сферы палітычнай і вонкавапалітычнай каардынацыі. У снежні было прынята рашэнне стварыць працоўную групу, якая цяпер функцыянуе. Яна павінна паглядзець, наколькі дамоўленасці той эпохі на сённяшні дзень выкананы, і што патрабуецца зрабіць, улічваючы сучасны стан развіцця Расеі і Беларусі. Роўна пра гэта і ідзе гаворка. Таму мы гатовыя працягваць супрацу настолькі, наколькі гатовая гэта рабіць сама Беларусь. Мабыць, з гэтага ж зыходзіць і беларускі бок. Значыць, мы дамовімся аб нечым. Я ўпэўнены ў гэтым«, – падкрэсліў ён.

  • Напрыканцы 2018 года беларуска-расейскія стасункі заўважна пагоршыліся. У снежні Аляксандр Лукашэнка некалькі разоў праводзіў перамовы з Уладзімірам Пуціным: расейскі лідар патрабаваў «глыбокай інтэграцыі», а Лукашэнка дамагаўся зніжэння цаны на газы і кампенсацыі за падатковы манеўр. Сёлета Лукашэнкі і Пуцін стасаваліся ў Сочы 13-15 лютага. Перамовы ва ўсіх выпадках скончыліся безвынікова.
  • Падатковы манеўр, які плануе рэалізаваць Расея, прадугледжвае, пачынаючы з 2019 года, паэтапнае ануляванне экспартных мытаў на нафту пры адначасовым павышэнні падатку на здабычу карысных выкапняў. У выніку з 2024 года Беларусь будзе закупляць сыравіну па сусветных коштах і пазбавіцца перавагі над канкурэнтамі па-за межамі ЕАЭС. Паводле міністра фінансаў Беларусі Максіма Ермаловіча, агульныя страты бюджэту краіны ад падатковага манеўру 2019-га да 2024 года могуць скласці $ 8–12 млрд. Менск хоча атрымаць ад Масквы кампенсацыю за падатковы манеўр, але расейскі бок на гэта пакуль не пагадзіўся.
  • Цана на газ для Беларусі – яшчэ адно спрэчнае пытанне ў беларуска-расейскіх стасунках. У 2018 годзе Беларусь купляла газ па фіксаванай цане $ 129 за тыс. куб.м. У 2019 годзе гэтая цана будзе $ 127. Цана на 2020 год яшчэ не вызначаная. Аляксандр Лукашэнка патрабуе, каб Беларусі далі магчымасць купляць газ па ўнутрырасейскім цэнам – па $ 70, як у Смаленскай вобласці. У Расеі лічаць такі варыянт магчымым толькі ва ўмовах больш шчыльнай інтэграцыі – гэта асноўная думка так званага ультыматуму Мядзведзева.
  • Ультыматум Мядзведзева – заява прэм’ер-міністра РФ на паседжанні Савету Міністраў Саюзнай дзяржавы, паводле якой на эканамічныя датацыі (у прыватнасці, праз адзіную палітыку тарыфаў і цэнаў) Беларусь можа разлічваць толькі ў выпадку рэалізацыі дамовы аб стварэнні Саюзнай дзяржавы ад 8 снежня 1999 года. У прыватнасці, гаворка ідзе пра стварэнне адзінага эмісійнага цэнтру, адзінай мытні, суду і падліковай палаты. У адказ Аляксандр Лукашэнка 14 снежня заявіў, што Беларусь ніколі не адмовіцца ад свайго суверэнітэту. «Калі нас хочуць, як Жырыноўскі прапаноўваў, падзяліць на вобласці і ўпіхнуць у Расею – гэтага не будзе ніколі», – падкрэсліў ён.

ІІ, belsat.eu

Глядзі таксама
Каментары