Саўмін змяніў правілы ўезду замежнікаў у Беларусь. Цяпер замежным грамадзянам пры ўездзе ў нашую краіну трэба мець даведку пра адсутнасць COVID-19.
Паводле зменаў пастановы Саўміну, замежныя грамадзяне, старэйшыя за 6 гадоў, мусяць мець даведку пра адсутнасць COVID-19, каб трапіць у Беларусь. Адпаведныя аналізы турыстам неабходна зрабіць не пазней за тры дні да ўезду. Пры гэтым для замежнікаў 140 краінаў, якія ўнесеныя ў спіс Мінздароўя, надалей застаецца абавязковай 10-дзённая ізаляцыя пры наведванні Беларусі.
Патрабаванне не датычыць пасажыраў, якія праязджаюць праз нашую краіну транзітам, дыпламатаў, а таксама турыстаў, якія прыязджаюць у Беларусь на лячэнне і на паляванне.
Беларускія ўлады з 1 лістапада абмежавалі ўезд грамадзянаў замежных краінаў праз наземныя пункты перасячэння мяжы. А з 21 снежня абгрунтоўваючы складанай эпідэміялагічнай сітуацыяй, зачыняюць мяжу і на выезд з краіны.
СК belsat.eu