Два чалавекі ў Менскай вобласці і адзін чалавек у Гарадзенскай вобласці загінулі падчас пажараў 11 студзеня. Пра гэта паведамляе Міністэрства па надзвычайных сітуацыях.
У 18:56 ратавальнікам паступіла паведамленне пра пажар у жылым доме ў аграгарадку Юшавічы Нясвіжскага раёну – там загінуў адзін чалавек.
Адзін чалавек загінуў таксама пры пажары ў жылым доме ў вёскі Задашчэнне Пухавіцкага раёну. Інфармацыя пра здарэнне паступіла ратавальнікам у 22:25.
Пра прычыны пажараў пакуль не паведамляецца.
У Гарадзенскай вобласці позна ўвечары 11 студзеня пажар адбыўся ў прыватным доме ў вёсцы Бойкі Слонімскага раёну. Агонь знішчыў дах, перакрыцце, пашкодзіў сцены і маёмасць у доме. Пад абломкамі быў знойдзены гаспадар дома 1965 году нараджэння, ён загінуў. Паводле асноўнай версіі, прычынай пажару стала пакінутая без нагляду ўключаная ў сетку электрычная пліта. У МНС адзначаюць, што ў зводках ратавальнікаў пажары на кухні фігуруюць амаль штодзённа.
ІІ belsat.eu
