Telegram-канал NEXTA апублікаваў скрыншоты перапіскі з бацькоўскага Viber-чату адной з менскіх школаў. У ім настаўніца просіць бацькоў падпісацца за Марыю Васілевіч, якая вырашыла стаць дэпутатам.
З перапіскі вынікае, што настаўніца – сябра ініцыятыўнай групы Васілевіч. Настаўніца прапануе бацькам падпісацца асабіста, або даслаць ёй пашпартныя дадзеныя ў «Viber».
Марыя Васілевіч балатуецца ў Палату прадстаўнікоў у акрузе № 104 у Менску. Дзяўчына перамагла ў нацыянальным конкурсе «Міс Беларусь» у 2018 годзе, пасля чаго яе заўважыў Лукашэнка. Прэс-сакратарка Лукашэнкі Наталля Эйсмант распавядала, што кіраўнік краіны асабіста рыхтаваў дзяўчыну да ўдзелу ў конкурсе «Міс свету». Таксама ён навучыў яе секчы дровы і прапанаваў узначаліць калгас.
Збор подпісаў за вылучэнне кандыдатаў працягнецца да 8 кастрычніка. Выбары ў Палату прадстаўнікоў пройдуць 17 лістапада.
ЮВ belsat.eu