Пасля таго, як Менск «папрасіў» польскіх і літоўскіх дыпламатаў, Румынія і Вялікая Брытанія на знак салідарнасці адклікалі з Беларусі сваіх паслоў для кансультацыяў. Славакія – рыхтуецца да такога ж кроку.
У пасольстве заявілі, што Вялікая Брытанія асуджае рашэнне Беларусі выслаць польскіх і літоўскіх дыпламатаў, бо яно цалкам ізалюе беларускі народ. Тым не менш вырашылі часова адклікаць свайго амбасадара для абмеркавання сітуацыі ў Беларусі.
Міністэрства замежных справаў Румыніі таксама адклікала свайго дыпламата.
– Мы вырашылі адклікаць нашага амбасадара ў Беларусі для кансультацыяў на знак салідарнасці з Літвою і Польшчай. Беларусь (дзейная ўлада – заўв. «Белсат») павінная зразумець, што ціск на дыпламатычным узроўні на краіны-удзельніцы Еўразвязу не дапамагае дыялогу і не прыносіць станоўчых вынікаў — напісаў у Twitter кіраўнік МЗС Румыніі.
На пачатку кастрычніка МЗС Беларусі запатрабавала скарачэння больш чым удвая колькасці дыпламатаў у пасольствах Польшчы і Літвы.
Амбасадар Польшчы Артур Міхальскі і амбасадар Літвы Андрыс Пулокас пакінулі Беларусь 5 кастрычніка. 9 кастрычніка выехалі 32 польскія дыпламаты. Раней сваіх паслоў адклікалі Латвія, Эстонія, Чэхія, Балгарыя і Нямеччына.
У Менску засталіся паслы толькі двюх краінаў Еўразвязу – Італіі ды Аўстрыі.
ЮЦ Belsat.eu
