З 22 верасня беларусы могуць ехаць у Польшчу з кожным тыпам візы. Але пры адной умове

Польшча пакрысе аслабляе парадак уезду беларусаў. Калі раней маглі ўязджаць толькі пэўныя катэгорыі грамадзянаў (з картай паляка або картай побыту), то цяпер могуць усе. Адзінае, што трэба прайсці 10-дзённы каранцін. Інфармацыя пра гэта змяшчаецца ў дакуменце, які апублікаваў МУС Польшчы.

Гэта азначае, што ўехаць на тэрыторыю Польшчы можа кожны беларус з кожным відам візы і з любымі мэтамі. Тэст на каронавірус не патрэбны, але абавязкова мець страхоўку на выпадак Covid-19. Таксама трэба будзе прайсці абавязковы 10-дзённы каранцін. Тэрмін каранціну пачынаецца на наступны дзень пасля ўезду. За парушэнне – штраф у памеры амаль $ 8000.

Кантраляваць выкананне каранціну дапамагаюць паліцыя і спецыяльнае мабільнае прыкладанне.

Тэрмін каранціну для замежнікаў у Польшчы скарочаны: раней трэба было выконваць самаізаляцыю цягам 14 дзён.

Авіязлучэнне ўзнаўляецца і з Расеяй. Цяпер у суседнюю краіну можна будзе трапіць на самалёце, абмежаванні на сухаземную мяжу пакідаюць. Палёты маюць адбывацца раз на тыдзень. «Белавія» аднаўляе рэйсы ў Маскву ад 30 верасня.

ДР belsat.eu

Hавiны