Актывіст грамадзянскай кампаніі «Еўрапейская Беларусь» Яўген Афнагель пракаментаваў вынікі парламенцкіх выбараў, якія адбыліся 17 лістапада, тэлеканалу «Euronews».
У размове з журналістамі каардынатар руху заявіў, што апазіцыя не прызнае вынікі выбараў.
«Натуральна, вынікі “выбараў” мы не прызнаем. Натуральна, было зразумела, што апазіцыю гэтак званы парламент не прапусцяць па адной простай прычыне: Лукашэнку ненавідзіць большасць беларусаў, і большасць беларусаў выступаюць супраць яго», – сказаў Яўген Афнагель.
Нагадаем, што ў Палату прадстаўнікоў не трапіў ніводзін прадстаўнік апазіцыі.
Парламенцкая асамблея рады Еўропы (ПАРЕ) расчараваная невыкананнем Беларуссю рэкамендацый асамблеі. «Гэта [невыкананне рэкамендацыяў – заўв. belsat.eu] пазбаўляе грамадзянаў магчымасці браць удзел у дэмакратычным працэсе», – заявіў 18 лістапада прадстаўнік дэлегацыі ПАРЕ лорд Дэвід Бленкатра. У сваю чаргу АБСЕ звяртае ўвагу на тое, што сёлетнія парламенцкія выбары прайшлі без «рэалізацыі на практыцы» іхных рэкамендацыяў.
ЮВ belsat.eu