Менчук Андрэй Міхалевіч рэпостнуў фільм NEXTA аб Лукашэнку – і атрымаў пазоў у міліцыю. Зараз хлапцу пагражае штраф ці нават содні. Пра цікаўнасць да палітыкі і планы на актывізм ён распавёў «Белсату».
Андрэю Міхалевічу – 18 гадоў і летась ён скончыў сярэднюю школу. Зараз працуе ў будаўнічым гіпермаркеце, бо не здолеў паступіць ва ўніверсітэт і вырашыў зарабляць грошы. У вольны час хлопец спявае, грае на гітары, любіць чытаць, піша вершы і песні – у тым ліку і па-беларуску.
Палітыкай па ўласным прызнанні ён цікавіцца даволі даўно – з 2015 года.
«Я паглядзеў запісы з мітынгаў 2011, 2010, 2008 года. Мне стала незразумела: адкуль столькі гвалту і злосці, каб біць бабуляў, дзядуляў… З гэтага моманту я пачаў адносна цікавіцца палітыкай».
Андрэй глядзіць беларускіх каля-палітычных блогераў: NEXTA, Марата Минского. Актыўна чытае беларускія навіны, у тым ліку і ў дзяржаўных СМІ – каб быць у курсе падзеяў.
Днём у пятніцу, калі Андрэй быў на працы, яму патэлефанаваў участковы і запрасіў у РАУС.
«Я не ведаў, чаму мяне выклікаюць, але вырашыў паехаў. Узяў з сабой матулю – вырашыў, што так будзе больш бяспечна размаўляць».
Андрэй адзначае, што размова была культурнай: міліцыянт не пагражаў і не ціснуў на хлопца.
«Ён максімальна да ўсяго лаяльна ставіўся, не сказаў бы, што ў яго было нейкае задавальненне ад таго, што адбываецца. Участковы – дакладна не быў нейкім дэманам», – падкрэслівае ён.
Аднак Андрэю прышлося яшчэ раз прыйсці ў пастарунак, каб скласці пратакол. Ён адзначае, што дзе было нават указана, што відэа было размешчанае на маёй старонцы да таго, як фільм быў уключаны ў спіс экстрэмісцкіх матэрыялаў. На пытанне, чаму ён размясціў гэты ролік, у юнака знайшоўся дакладны адказ.
«Я патлумачыў, што выклаў відэа, бо маю адпаведную грамадзянскую пазіцыю і лічу яго важным для сваіх сяброў».
Бацькі падтрымліваюць учынак Андрэя: і датычна відэа, і рашэння зрабіць гісторыю публічнай. Большасць сяброў таксама падтрымалі хлопца. Але ёсць і такія, хто лічыць, што трэба маўчаць і не ўмешваць палітыку. З уласным стаўленнем да ўчынку Андрэй яшчэ не вызначыўся.
«Я спрабаваў дыскрэдытаваць уладу, але атрымалася неяк па-дзіцячаму…. Але такіх наступстваў я не чакаў. Я такі ж грамадзянін як і ўсе. Я мушу мець права нешта сказаць!».
Андрэй перажывае за сваю матулю: тая працуе настаўніцай у школе і вельмі любіць сваю прафесію.
«Я не хачу, каб з-за майго ўчынку, правільнага ці не, у яе былі праблемы. Сваімі выступамі ў СМІ я падпісваю сабе прысуд і магу прыцягнуць назіранне Вялікага Брата».
У будучыні Андрэй не выключае, што будзе займацца актывізмам. Мяркуе, што будзе дапамагаць такім жа людзям, як ён – зарэпосціўшым запіс і патрапіўшым у бяду.
Фільм NEXTA «Лукашэнка. Крымінальныя справы» выйшаў 26 кастрычніка 2019 года. Дакументальны фільм, які распавядае аб палітычнай кар’еры кіраўніка Беларусі і значных для краіны падзеях у хуткім часе стаў адным з найбольш прагляданым у беларускім сегменце YouTube.
Аднак 6 снежня 2019 года рашэннем суда Цэнтральнага раёну Менску ён быў прызнаны экстрэмісцкім і ўключаны ў адмысловы спіс.
Ксенія Тарасевіч belsat.eu