Аляксандр Лукашэнка на сустрэчы з навучэнцамі «Моладзь. Погляд у будучыню» распавёў, што ў дзяцінстве не хацеў быць прэзідэнтам – ён марыў быць футбалістам.
«Я страшэнна любіў футбол і хацеў быць вялікім спартоўцам. Але я не патрапіў ні да якога трэнеру, ды і гаворкі не магло быць. Як маглі, так і гулялі», – адзначыў Лукашэнка.
Паводле ягоных слоў, пра палітычную карʼеру ён нават не думаў.
«Я тады не думаў пра тое, каб стаць прэзідэнтам. І думаць не мог. Па-першае, прэзідэнтаў у краіне не было. Былі генеральныя сакратары. Але я таксама не думаў пра тое, каб стаць нейкім там сакратаром», – распавёў Лукашэнка, адказваючы на адно з пытанняў.
«Скажу шчыра: у мяне было адзінае жаданне, – паколькі я жыў не ў лепшым сяле, бачыў пакуты гэтых людзей, бачыў недахопы, бачыў, як яны жылі, – у мяне было жудаснае жаданне ўзяць нейкую тэрыторыю, гаспадарку, і гэтым людзям зрабіць нешта добрае», – цытуе прэзідэнта ягоная прэс-служба.
На сустрэчы з моладдзю Лукашэнка таксама выказаўся наконт выкарыстання беларускай мовы ў школе пры выкладанні гістарычных прадметаў.
«Я катэгарычны праціўнік навязвання вучням нейкай дзяржаўнай мовы – у нас іх дзве – расейская і беларуская. Чалавек сам павінен вызначыцца, на беларускай ці расейскай ён будзе вывучаць, – сказаў ён. – Калі вы мяне спытаеце, а я як хацеў бы… Я хацеў бы, каб гэтыя прадметы вывучаліся на беларускай мове. Мы больш маем зносіны, у тым ліку ў побыце, на расейскай мове. Беларускай мовы ў нашым побыце не хапае. Дрэнна гэта ці добра? Не ведаю. Не думаю, што гэта катастрофа».
ІІ, belsat.eu