Выстава-продаж беларускай фатаграфіі ў Менску: кошты за здымак – ад 35 да 4500 рублёў
З 9 да 11 лістапада ў Менску ў Палацы мастацтва праходзіць выстава-продаж аўтарскай беларускай фатаграфіі Minsk Photo Days, на якой можна не толькі пабачыць дасягненні беларускай фатаграфічнай супольнасці, але і пры жаданні – набыць сабе здымак. Калі кошт спадабаецца.
Такая выстава праходзіць штогод. Пра вынікі першага дня і тое, колькі ўвогуле каштуюць здымкі беларускіх фатографаў, Belsat.eu распавёў адзін з арганізатараў падзеі – Сяргей Міхаленка.
– У першы дзень абсалютнае лідарства – у Сяргея Кажамякіна. У яго адбыліся два продажы. Але цэнаў, па якіх адбыліся продажы, аўтар не пажадаў агучваць.
Самы танны здымак на кірмашы каштуе 35 рублёў, а самы дарагі – 4500! Гэта здымак «Дачка», які быў надрукаваны на вокладцы выдання «Photo Manifesto: Contemporary Photography in the USSR» у 1991 годзе.
Выгадным набыццём могуць стаць працы Ігара Саўчанкі. Іх кошт на фота-кірмашы – да 1000 рублёў. З улікам таго, што працы Саўчанкі добра прадаюцца за мяжой за значна большыя кошты, то прапанова добрая.
Кошты залежаць ад таго, наколькі здымкі ўнікальныя, дзе яны друкаваліся і колькі экзэмпляраў ёсць у свеце, ад даўнасці здымку і ад вядомасці аўтара. Таксама параўноўваецца, за колькі аўтар ужо прадаваў свае здымкі. Увогуле, коштаўтварэнне ў Беларусі – складанае пытанне. Тым больш, калі гаворка ідзе пра арт-кірмаш. Але ж мы на кірмашы! Таму можна гандлявацца. Пагатоў, прадае здымкі – аўтар.
Дарэчы, цяпер у Францыі таксама праходзіць арт-кірмаш Paris Photo – найбуйнейшы фота-кірмаш у свеце. Там здымкі ацэньваюць на тысячы еўраў. Таксама ў Парыжы 9 лістапада адбыўся фатаграфічны аўкцыён Sotheby’s, на якім было выстаўлена 75 фотаздымкаў. Фатаграфіі прадалі за кошты ад 2 да 106 000 еўраў.
ЛП, здымкі Сяргея Міхаленкі, belsat.eu
