Вынікі НЕрэгістрацыі кандыдатаў: людзі выйшлі пратэставаць. Падчас стрыму затрыманыя журналісты «Белсату»

«Белсат» ў жывым эфіры падводзіў вынікі рэгістрацыі кандыдатаў у прэзідэнты і асвятляў стыхійныя мітынгі.

23:58 Праваабарончы Цэнтр «Вясна» назваў прозвішчы прынамсі 128 затрымных пад час стыхійных акцыяў у краіне. Да гэтага моманту адпусцілі не ўсіх.

23:10 Журналістаў Алеся Пілецкага і Андрэя Рабчыка адпусцілі з РУУС Цэнтральнага раёну Менску. Месца знаходжання журналістаў «Белсату» Кацярыны Андрэевай і Арцёма Лявы – невядомае. У аніводным сталічным аддзяленні «Белсату» ці сваякам не пацвердзілі нават факту іхнага затрымання.

22.59 На праспекце Незалежнасці і на Нямізе адлючылі ўсе ліхтары.

22:40 Мірны пратэст на Нямізе працягваецца.

Менчукі на Нямізе. Фота: Аліса Ганчар / «Белсат»
Менчукі на Нямізе. Фота: Аліса Ганчар / «Белсат»

22:18 Наш карэспандэнт Зміцер Міцкевіч перадае з Нямігі, што пратэст больш нагадвае святкаванне.

Менчукі пляскаюць на Нямізе ў знак салідарнасці з затрыманымі і супраць нерэгістрацыі Віктара Бабарыкі ЦВК. 14 ліпеня. Фота: Аліса Ганчар / «Белсат»

Дасюль на вуліцы вельмі шмат людзей, але і шмат затрыманняў. З надыходам цемры ўдзельнікі акцыі салідарнасці пачалі паволі разыходзіцца.

Фота: Хрысціна Чарняўская / «Белсат»

22:10 Перакрылі вуліцу Казлова і выставілі аўтазакі. Большасць людзей разышліся. Колькасць затрыманых сягнула 60 асобаў – паводле падлікаў праваабаронцаў.

22:00 Аўтазакі перанакіраваліся за Палац Рэспублікі. На пл. Перамогі затрыманнямі кіруе непасрэдна міністр унутраных справаў Юрый Караеў.

На Нямізе, дзе адбывалася штурханіна з АМАПам, з’явіліся вайскоўцы.

Фота: Аліса Ганчар / «Белсат»

21:51 На скрыжаванні Праспекту і вул. Казлова, з усіх бакоў шмат людзей: яны пляскаюць у далоні, свісцяць і выкрыкваюць «ганьба» аўтазакам і міліцыі, якая праязджае побач. Аўтамабілісты працягваць падтрымліваць людзей сігналамі.

Затрыманы журналіст BBC.

Аўтазакам на пратэст – адказ улады. Фота: Аліса Ганчар / «Белсат»

21:43 У сацсетках паведамляюць пра бойку натоўпа з АМАПам на плошчы Перамогі.

21:36 Карэспандэнты паведамляюць, што на плошчы Перамогі адбылася патасоўка з АМАПам. Шмат людзей сабраліся на Нямізе і пляскаюць у ладкі. Ёсць затрыманыя.

Роварыстаў, якія ехалі вуліцамі Менску на знак пратэсту, затрымліваюць разам з роварамі. Фота: Аліса Ганчар / «Белсат»

Закрылі ст.м. «Кастрычніцкая». Цягнікі не спыняюцца.

21:18 Гвалтам АМАП затрымаў журналістку «Белсату» Кацярыну Андрэеву, якая вяла стрым з цэнтру Менску. Нашую калегу закінулі ў аўтазак.

Кіроўцы і раварысты – удзельнікі акцыяў. Фота: Аліса Ганчар / «Белсат»

20:45 У Менску масавыя затрыманні. Сярод затрыманых Арцём Лява, які вёў стрым-трансляцыю для «Белсату». Цяпер ён у аўтазаку.

Арцём Лява. Фота: Аліса Ганчар / «Белсат»

Агулам затрыманыя па ўсёй краіне 9 журналістаў, у тым Алесь Пілецкі з Радыё «Свабода».

На 46 секундзе бачна, як затрымліваюць Арцёма Ляву.

20:38 Людзі пляскаюць у далоні і крычаць Ганьба на АМАПаўцаў, якія затрымліваюць людзей. Калоны спецтранспарту вельмі хутка едуць уздоўж праспекту.

20:26 АМАП спрабуе перашкодзіць людзям перасоўвацца ўздоўж праспекту. Міліцыянты кропкава вычапляюць і затрымліваюць мінакоў.

Акцыя ў Менску 14 ліпеня. Удзельнік прагульваюцца цэнтральным праспектам. Фота: «Белсат»

Праз перакрыты праспект людзі пачалі збірацца ў іншых кропках гораду – на Нямізе, у Грушаўцы.

20:18 Пешыя прывіталі калону раварыстаў воклічамі і апладысментамі. Аднаго ўдзельніка калоны заштурхнулі ў аўтазак.

На Плошчы Перамогі назіраецца павышаны рух аўтазакаў.

Хваля пратэсту кляскае ў далоні ў Менску. Фота: Аліса Ганчар «Белсат»

20:11 Аднаму з мінакоў стала блага, вакол яго сабраліся людзі і просяць выклікаць хуткую. Паводле аднаго прысутнага, мужчына ляжыць на зямлі ўжо амаль 40 хвілін.

Згуртаванні людзей у раёне Плошчы Перамогі і Кастрычніцкай. Людзі курсуюць уздоўж вуліцы ў абодва бакі. Дакладнай інфармацыі па колькасці затрымалых няма. Паводле папярэдніх падлікаў праваабаронцаў, на праспекце цяпер каля некалькіх тысяч менчукоў.

Да пешых далучыліся раварысты.

20:00 Пачаліся затрыманні.

19:30 Карэспандэнты «Белсату» паведамляюць, што цэнтр Менску ад Акадэміі Навук перакрыты, у горад не пускаюць. На вуліцах бачныя аўтазакі. Затрыманняў пакуль не было.

Людзі ідуць уздоўж праспекту. Аўты, якія праяжджаюць, перыядычна сігналяць.

Акцыя ў Менску 14 ліпеня. Фота: «Белсат»
Менску 14 ліпеня. Людзі ідуць у бок Плошчы Перамогі. Фота: «Белсат»

Затрымалі журналіста «Еўрарадыё» Міхася Ільіна і Арцёма Маёрава.

Хваля пратэсту расце ў Менску пасля нерэгістрацыі ЦВК Цапкалы і Бабарыкі. Фота: Аліса Ганчар \ «Белсат»

З’яўляецца інфармацыяю, што людзі збіраюцца ў абласных цэнтрах – Гомлі, Берасыі, Горадні. Людзі сабраліся і ў Пружанах. АМАП таксама праводзіць затрыманні.

Цэнтр Менску перакрылі. Фота belsat.eu

*****

Ранкам 14 ліпеня ЦВК адмовіўся рэгістраваць у якасці кандыдатаў на прэзідэнта Віктара Бабарыку і Валерыя Цапкалу. У тэлеграм-каналах пасля гэтага з’явіліся заклікі а 19-й выходзіць на галоўныя вуліцы беларускіх гарадоў, каб выказаць пратэст супраць дзеянняў улады. У ананімных апытаннях у сеціве гатовасць узяць удзел у пратэстах выказалі тысячы чалавек.

У эфіры «Белсату» вынікі рэгістрацыі каментуе кандыдат на прэзідэнта на выбарах 2010 года Уладзімір Някляеў:

«Я не ўдзельнічаў у перадвыбарнай гонцы менавіта таму, што ведаў, што так будзе. Поспех мог быць пры адной умове – адным кандыдаце ад дэмакратычнай апазіцыі. Мы вылучылі Статкевіча не таму, што мы дурныя, а каб акцэнтаваць увагу на тым, што адбываецца. Я паважаю Бабарыку, з піетэтам стаўлюся да Цапкалы, але спешчаныя людзі не могуць стаяць. Яны мусяць быць прыгатаваныя да таго, каб ахвяраваць сабой і усім…Толькі сіла на сілу. За сілу войска і спецназу вышэйшая сіла народная. Павінен быць такі кандыдат, які сцісне гэту сілу ў адзін кулак, які прыстукне ўладу».

«Заклік штабу Бабарыкі да галасавання 9 жніўня сведчыць пра адсутнасць палітычнага досведу вылучэнца і ягонай каманда, і няма чаго ўскладаньваць. У ягоным штабе людзі, спешчаныя жыццём: хапае грошай на курорты і адпачынкі… І раптам трэба змяніць усё разуменне… Яны не могуць. І не могуць пайсці ў суд праз Плошчу».

На конт народнай рэакцыі на нерэгістраванне кандадатамі спадароў Бабарыкі і Цапкалы Уладзімір Някляеў сказаў:

«Беларусы, не гледзячы на самаарганізацыю ў сацсетках, яшчэ не могуць выходзіць масава самыя. Ім трэба нехта, хто будзе наперадзе. Такім чалавекам быў Сяргей Ціханоўскі – лідар мірнага пратэсту».

На думку Уладзіміра Някляева ўлады не хочуць разумець змены, якія адбываюцца ў беларускім грамадстве:

«У 2010 годзе Лукашэнка таксама казаў, што зразумеў, што ў грамадстве ёсць іншадумцы. Сказаў і забыўся. Ён сам паверыў у сваё месіянства, маўляў, гэта вы стварылі Беларусь».

Прамову Андрэя Дзмітрыева Някляеў назваў «спробай заняць нішку адзінага дэмакратычнага кандыдата».

«Трэба аддаць яму належнае – з усёй гэтай кампаніі ён з самым хуткім розумам. Калі б гэты розум не быў подлы… Але чалавек жа мяняецца. Прайшло 10 гадоў».

Таксама мы збіраем інфармацыю пра тое, як выбарнікі, якія масава падпісваліся за права альтэрнатыўных кандыдатаў удзельнічаць у кампаніі, адрэагавалі на рашэнне галоўнай камісіі.

Лідзія Ярмошына зарэгістравала 5 кандыдатаў на прэзідэнта: Аляксандра Лукашэнку, Андрэя Дзмітрыева, Ганну Канапацкую, Святлану Ціханоўскую і Сяргея Чэрэчня.

ІІ belsat.eu

Hавiны