Вярхоўная Рада спрасціла выдачу ўкраінскіх пашпартоў замежным добраахвотнікам


Вярхоўная Рада Украіны 6 чэрвеня ў другім чытанні прыняла закон «Аб унясенні змяненняў у некаторыя законы Украіны адносна прававога статусу замежнікаў і асоб без грамадзянства, якія прымалі ўдзел у абароне тэрытарыяльнай цэласнасці і недатыкальнасці Украіны» (№3433). За яго прагаласавалі 230 народных дэпутатаў, перадае УНІАН.

Новы закон дае права замежнікам, якія ваявалі за незалежнасць Украіны, атрымаць грамадзянства Украіны і перадухіліць іх выдачу «несяброўскім краінам». Пра якія менавіта дзяржавы вядзецца гаворка – не ўдакладняецца.

Пад дзеянне закону падпадаюць замежныя грамадзяне і асобы без грамадзянства, якія аказвалі дапамогу падраздзяленням Узброеных сіл Украіны, іншым сілавым падраздзяленням або добраахвотніцкім фарміраванням у зоне правядзення антытэрарыстычнай аперацыі. Іхнае перабыванне ва Украіне лічыцца законным, у тым ліку ў выпадках, калі папярэдні пашпарт пратэрмінаваны.

Беларускі добраахвотнік Ян Мельнікаў. Фота: Антось Цялежнікаў

Законам прадугледжана, што замежнікі, якія ваявалі за Украіну, не могуць быць прымусова вернутыя ў краіну паходжання або трэцюю краіну, якая здзейсніла акт агрэсіі супраць Украіны, ці ў краіну, якая не прызнае тэрытарыяльную цэласнасць і суверэнітэт Украіны, або адмаўляецца прызнаваць проціпраўнасць замахаў на тэрытарыяльную цэласнасць і суверэнітэт Украіны, у прыватнасці, галасавала супраць Рэзалюцыі Генеральнай асамблеі ААН «Аб тэрытарыяльнай цэласнасці Украіны» ад 27 сакавіка 2014 г. № 68/262 ».

Такім чынам, гаворка аўтаматычна вядзецца і пра Беларусь, якая галасавала супраць згаданай рэзалюцыі, у фарватары палітыка Крамля.

Беларускія добраахвотнікі патрабуюць ад Зяленскага надаць ім украінскае грамадзянства

Паводле звестак Belsat.eu, ад 200 да 500 беларусаў бралі ўдзел у канфлікце на Данбасе на баку Украіны з 2014 года. Вярнуцца ў Беларусь гэтыя людзі не могуць, бо супраць большасці з іх распачатыя крымінальныя справы. Добраахвотнікі некалькі гадоў дабіваліся прыняцця адпаведнага закону, які б спрасціў працэдуру атрымання ўкраінскага пашпарту і забараніў магчымую экстрадыцыю па запыце беларускіх спецслужбаў.

Закон уступае ў сілу праз два месяцы з дня яго апублікавання.

КА belsat.eu

Глядзі таксама
Каментары