На 12 красавіка паводле грыгарыянскага календара сёлета прыпадае галоўнае хрысціянскае свята – дзень Уваскрэсення Хрыстовага, або Вялікдзень. Праваслаўныя сёння адзначаюць Вербную нядзелю – дзень уваходжання Хрыста ў Ерусалім. Вялікдзень у праваслаўных – праз тыдзень, 19 красавіка.
Касцёл Святога Сымона і Святой Алены
У Чырвоным касцёле людзей няшмат, асноўная частка людзей прыйшла раніцай. Вернікі трымаюць дыстанцыю, побач стаяць толькі семʼі. Ксёндз і большасць наведнікаў надзелі маскі.
Царква ў гонар Раства Іаана Прадцечы
На літургіі вернікі стаяць шчыльна, людзей у масках мала. Пасля кожнага падыходу да абраза яго праціраюць растворам. Перад прычасцем раздаюць аднаразовыя сурвэткі. Акрапленне вярбы святой вадой адбываецца на вуліцы, святар просіць захоўваць адлегласць.
Па ўсім свеце святары заклікаюць вернікаў глядзець набажэнствы онлайн і па магчымасці заставацца дома.
Ірына Арахоўская belsat.eu
