ВОТ ТАК! Белсат запускае інфармацыйны партал па-расейску

 

1 траўня распачынае працу інфармацыйны партал ВОТ ТАК – новы праект нашага тэлебачання, арыентаваны на расейскую і расейскамоўную аўдыторыю. З гэтага часу «Інфармуем і тлумачым» – таму што так гучыць мота парталу – на гэтай мове яшчэ лепш. Менавіта гэтак!

«Вот так!»

– менавіта такую назву носіць штодзённы рускамоўная навінная праграма, якую гледачы «Белсату» глядзяць з сярэдзіны 2017 года. Як і ўвесь «Белсат», яна даступная праз спадарожнік Astra 4A, які ахоплівае еўрапейскую частку былога СССР, а таксама ў Інтэрнэце – на сайце тэлеканалу і на YouTube.

Самае папулярнае відэа – спецвыданне пра пажар у Кемерава ў Сібіры, які адбыўся ў канцы сакавіка 2018 года – паглядзела рэкордная колькасць карыстальнікаў YouTube – больш за восем мільёнаў. На канал «ВОТ ТАК» на гэтай платформе падпісаныя цяпер 215 тыс. чалавек.

https://belsat.eu/in-focus/belarusy-shukayuts-praudy/?fbclid=IwAR2O4ymzQEJ4zuDMcpRdH8whmr60ez7gKvzStsK9urreop10hAkXOkC85tc

Усё гэта тлумачыць, чаму незалежнае беларускае тэлебачанне, якім з’яўляецца «Белсат», цяпер адкрываецца яшчэ шырэй для аўдыторыі не толькі з Беларусі, але і Расеі і ўсёй тэрыторыі былога СССР.

– Працуючы над стварэннем «Белсату», з цягам часу мы сталі больш ясна бачыць, што ў Беларусі праблемай зʼяўляецца не толькі (і можа нават не ў першую чаргу) прапаганда Лукашэнкі, але і прапаганда Крамля, якая пранікае абсалютна ўсюды на постсавецкай інфармацыйнай прасторы і становіцца адным з найбольш небяспечных і падступных інструментаў палітычнага дамінавання і прыгнёту, – адзначае дырэктар «Белсату» Агнешка Рамашэўская-Гузы. – Мы прыйшлі да высновы, што наш унікальны інструмент, якім зʼяўляецца «Белсат» і наш унікальны досвед павінен выкарыстоўвацца таксама і ў гэтай галіне. Мы таксама адзначылі, што наша тэлебачанне, нягледзячы на моўныя адрозненні, праглядаецца і ва Украіне, і ў Расеі. Такім чынам, лагічным працягам гэтых дзеянняў сталася спачатку рускамоўная тэлепраграма «Вот так», прысвечаная падзеям на тэрыторыі краін б. СССР, а зараз запуск аднайменнага парталу.

Па-расейску і без цэнзуры

Ад пачатку траўня на сайце vot-tak.tv можна будзе глядзець відэаматэрыялы і чытаць аналітычныя тэксты і каментары пра сітуацыю на постсавецкай прасторы. Новы партал «Белсату» – гэта адказ на патрэбы расейскамоўных карыстальнікаў Інтэрнэту, якія не давяраюць дамінуючым у сваіх краінах СМІ, якія залежаць ад Крамля.

– На канал «ВОТ ТАК» часцей за ўсё заходзяць гледачы з Садружнасці Незалежных Дзяржаў – яго глядзяць расейцы, украінцы, кіргізы, казахі, чачэнцы, армяне… У нас таксама ёсць профілі ў сацыяльных сетках – толькі на Facebook наш відэакантэнт для рускамоўнай аўдыторыі ўжо мае мільёны праглядаў. Мы разлічваем на тое, што з запускам новага партала людзі будуць ужо не толькі глядзець нас, але і чытаць, – кажа Вольга Швед, упаўнаважаная па развіцці інтэрактыўны медыяў.

А паводле Аляксея Дзікавіцкага, намесніка дырэктара тэлеканалу «Белсат», стварэнне рускамоўнага інфармацыйнага парталу з’яўляецца, з аднаго боку, наступным этапам развіцця тэлеканалу, а з другога – натуральным следствам яе бягучай дзейнасці.

Паведамляем і тлумачым

– Цяпер фактычна няма такога адзінага незалежнага і транснацыянальнага парталу, дзе чытач мог бы ў адным месцы знайсці інфармацыю аб тым, што адбываецца ў краінах былога СССР. Мы хочам такую магчымасць рускамоўнай аўдыторыі стварыць – з асаблівай увагай да інфармацыі з Расеі, Беларусі і Украіны, – кажа Аляксей Дзікавіцкі.

Ён падкрэслівае, што гэта рэальна, бо ў гэтых краінах «Белсат» ужо мае сетку карэспандэнтаў. Таксама прыцягваюцца аўтары, якія пішуць пра Казахстан ці краіны Балтыі:

– Мота парталу – «Паведамляем і тлумачым», таму мы будзем імкнуцца не абмяжоўвацца кароткімі нататкамі, а паказваць працэсы і апісваць больш шырокі кантэкст падзей, – дадае ён. – Мы таксама будзем публікаваць меркаванні вядомых расейскіх, беларускіх і ўкраінскіх публіцыстаў, якія супрацоўнічаюць з намі і, вядома ж, уласныя відэаматэрыялы.

Для міжнароднай аўдыторыі

Новы партал з’яўляецца буйным пачынаннем як з пункту гледжання велізарнага абшару, з якога будзе паступаць інфармацыя ад карэспандэнтаў, а таксама з пункту гледжання асаблівых патрабаванняў, якія стаяць перад камандаю журналістаў, што напаўняюць сайт.

– Праца ў такой міжнароднай камандзе – гэта не толькі надзвычай цікавы прафесійны досвед, але і сапраўдны выклік, – не хавае Лола Бурыева, рэдактарка сайта Vot-tak.tv.

На ейную думку, найважнейшай задачай зʼяўляецца захаванне раўнавагі і абʼектыўнасці ў тэмах, якія датычаць розных краінаў. Нягледзячы на тое, што каманда журналістаў шматнацыянальная, шэф-рэдактар ставіць перад імі няпростую ўмову. Тую самую, пра якую раней казаў Аляксей Дзікавіцкі – з падбору матэрыялаў на сайце не павінна быць відавочна, хто дзяжурыць: беларус, украінец ці расеец.

– Жыхары постсавецкай прасторы – гэта мноства людзей розных нацыянальнасцяў. Для нас гэта выклік: напісаць для грамадзянаў розных краінаў гэтак, каб ім было цікава чытаць навіны не толькі пра сябе, але і пра суседзяў, і ў цэлым свеце. Зацікавіць чытача і зрабіць гэтак, каб ён абраў менавіта наш сайт, – адзначае рэдактарка парталу.

Інфармаваць пра галоўныя падзеі рэгіёну і свету, а таксама тлумачыць іх значэнне аўтары парталу пачынаюць ужо сёння.

belsat.eu

Hавiны