Адзін з дзяжурных лекараў маскоўскага шпіталю імя Скліфасоўскага паведаміў журналістам, што заўважыў у больніцы чалавека, вельмі падобнага на былога кіраўніка Украіны Віктара Януковіча.
Паводле медыка, Януковіч паступіў у клініку яшчэ ў пятніцу ў стане, пры якім не мог рухацца: у яго падазраюць сур’ёзную траўму хрыбта, а таксама траўму калена.
«Камсамольская праўда» піша, што траўму ён атрымаў падчас гульні ў тэніс на вядомым падмаскоўным корце, адкуль Януковіча забрала «хуткая».
Лекар дадаў, што Януковіча суправаджалі некалькі чалавек.
У блоку больніцы, дзе яму аказвалася дапамога, на кароткі час абмежавалі доступ для наведнікаў, пасля Януковіча скіравалі ў рэанімацыю, але ў хуткім часе павезлі ў нейкую прыватную клініку.
Адзін з адвакатаў Януковіча, Аляксандр Гарашынскі, пацвердзіў выданню «Обозреватель», што ягоны падабаронны не можа рухацца.
«Я быў у Маскве ў пятніцу. Паехаў абмеркаваць пытанне яго ўдзелу ў відэаканферэнцыі (па якой Януковіч павінен сказаць апошняе слова). Я сустрэўся з ім у больніцы. Дыягназ дакладна сказаць не магу, гэта будзе некарэктна. Але траўма досыць цяжкая і ён не можа рухацца», – паведаміў адвакат.
Прэсавы сакратар Януковіча адмовіўся каментаваць медыям гэтую інфармацыю.
ДД