Вераніка Цапкала, прадстаўніца штаба Валерыя Цапкалы, распавяла аб сваім нечаканым ад’ездзе з Беларусі.
Вераніка Цапкала падкрэсліла, што ад’езд быў звязаны з яе сямейнымі абставінамі.
«Я тут, бо вырашыла правесці гэты важны дзень для мяне, для Беларусі разам са сваімі дзецьмі, якіх я не бачыла некалькі тыдняў [Вераніка Цапкала была вымушаная вывезці сваіх дзяцей за мяжу пасля пагроз – belsat.eu]. У нас не засталося ніякіх мітынгаў, ніякіх сумесных мерапрыемстваў з абʼяднаным штабам, таму я вырашыла правесці гэты важны дзень сярод беларусаў, якія знаходзяцца за мяжой, у тым ліку ў Расеі і перш за ўсё побач з маімі дзецьмі.
«Я лічу, што гэта гістарычны момант для Беларусі, я хачу, каб мае дзеці запомнілі гэты дзень назаўжды. Я разумею, што яны цяпер маленькія, але пройдзе час і я растлумачу ім, што гэта быў гістарычны дзень», – падкрэсліла Вераніка.
Ці ёсць рызыка для кандыдатаў, якія застаюцца ў Беларусі?
Вы ведаеце, у нас у краіне, як паказвае практыка, ніхто нічога прадбачыць не можа. Мы бачым, што за апошнія некалькі дзён затрымалі велізарную колькасць людзей, якія працуюць непасрэдна ў нашых штабах. Учора, напрыклад, у Святланы Ціханоўскай затрымалі яе памочніцу – кіраўніцу яе штаба, затрымалі яе давераную асобу. З нашага штаба, штаба Валера Цапкалы, таксама затрымлівалі людзей. Мы бачым, што ў дзейнай улады і Лукашэнкі ніякіх прынцыпаў няма, таму што будзе далей, ніхто не ведае.
Вы плануеце вяртацца ў Беларусь?
Так, я планую вяртацца ў Беларусь.
Што можна чакаць заўтра? Якія прагнозы?
Мы спадзяемся, што пераможа розум, спадзяемся, што нашы грамадзяне гатовыя для пераменаў. Мы вельмі спадзяемся, што гэтыя перамены хутка наступяць, бо мы хочам прачнуцца ў свабоднай і, самае галоўнае, бяспечнай Беларусі. І я, і многія беларусы, якія пакінулі краіну, зрабілі гэта ў мэтах бяспекі. Мы хочам, каб наша краіна была бяспечнай, мы хочам гадаваць сваіх дзяцей у Рэспубліцы Беларусь. Мы не хочам з’язджаць. Але нас проста выціскаюць, выганяюць з нашай краіны, ціснуць на нашых дзяцей, ціснуць на палітычных фігур, на кандыдатаў, таму мы спадзяемся на перамены. І гэтыя перамены здарацца як раз заўтра.
Наколькі верагодныя фальсіфікацыі?
Цяжка сказаць, мы са свайго боку – Абʼяднанага штаба – мы стварылі вельмі шмат рэсурсаў, вельмі шмат розных платформаў, ініцыятыў, каб мінімізаваць працэнт фальсіфікацыі выбараў.
Наколькі імаверна, што будуць страляць у народ?
Я спадзяюся, што не будуць, я спадзяюся, што яны нас пачуюць.
«Я спадзяюся, што яны разумеюць, што сярод гэтых людзей могуць быць іх мамы, таты, іх браты, сёстры, іх сябры. Я спадзяюся, што ў апошнюю хвіліну яны адумаюцца. Калі яны атрымаюць гэты незаконны загад – яны не дапусцяць праліцця крыві. Я звяртаюся яшчэ раз да праваахоўнікаў, сілавых структураў: калі ласка, не дапусціць праліцця крыві», – адзначыла Вераніка Цапкала.
Нагадаем, што раніцай каля 14:00 Вераніка Цапкала абвесціла, што пакінула Беларусь. Цяпер яна знаходзіцца ў Маскве.