У Венесуэле без святла засталіся 23 з 25 штатаў краіны, а таксама сталіца Венесуэлы – Каракас.
Як паведамляе DW, праз аварыю на найбуйнейшай гідраэлектрастанцыі краіны шырокамаштабнае адключэнне электрычнасці адбылося ўвечары ў чацвер, 7 сакавіка.
Спыніў працу венесуэльскі міжнародны аэрапорт Майкетыі, абясточаныя некалькі лініяў метро. У сталіцы Венесуэлы таксама назіраюцца перабоі з мабільнай сувяззю.
Нацыянальная электрычная кампанія Венесуэлы (Corpoelec) заявіла, што прычынай перабояў з падачай электрычнасці стала дыверсія на найбуйнейшай гідраэлектрастанцыі краіны «Эль-Гуры».
«Гэта частка электрычнай вайны супраць дзяржавы», – заявілі ў кампаніі.
Прэзідэнт Венесуэлы Нікаляс Мадура ў чацвер абвінаваціў «амерыканскі імперыялізм» у датычнасці да перабояў з электразабеспячэннем у краіне.
«Электрычная вайна, абвешчаная і ўзначаленая амерыканскім імперыялізмым супраць нашага народа, будзе пераможана», – напісаў Мадура у сваім Twitter.
Міністр энергетыкі Венесуэлы паабяцаў, што праблемы з электрычнасцю ліквідуюць на працягу трох гадзін, аднак ягоны аптымізм апынуўся неапраўданым. Жыхары некалькіх раёнаў Каракаса ў чацвер вечарам выйшлі на вуліцы, патрабуючы ад уладаў аднавіць электразабеспячэнне.
Прадстаўнікі нацыянальнай Федэрацыі работнікаў сферы электразабеспячэння Венесуэлы неаднаразова заяўлялі, што аварыі ў профільнай сферы звязаныя са старым абсталяваннем і недахопам рэсурсаў для выканання прафілактычнага абслугоўвання сетак і падстанцый.
Дзяржсакратар ЗША Майк Пампэёў назваў дэфіцыт электраэнергіі і голад у Венесуэле «вынікам некампетэнтнасці рэжыму Мадура».
КА, belsat.eu