Ва Украіне затрымалі Уладзіслава і Ірыну Грышчанкаў, якіх падазраюць у рыхтаванні забойства ў Івана-Франкоўске. Справу былых добраахвотнікаў перадалі следчаму, які расследуе забойства Паўла Шарамета, што адбылося ў 2016 годзе, паведамляе pravda.com.ua.
Уладзіслава Грышчанку з пазыўным «Буча» і яго жонку Ірыну з пазыўным «Пума» падазраюць у замаху на забойства і незаконным абыходжанні са зброяй. Паводле следства, сужонкі зрабілі выбухоўку і прымацавалі яе да аўто ахвяры ў горадзе Косаў Івана-Франкоўскай вобласці. Справа мела месца ў 2018 годзе. Прыстасаванне не спрацавала, а пацярпелы заўважыў выбухоўку і паведаміў у паліцыю. Ахвярай павінен быў стаць 61-гадовы Міхаіл Чэкурак, якога цяпер судзяць за напад і рабаванне.
Справу Грышчанкаў перадалі ў Кіеў і яе вядзе следчы, каторы займаецца забойствам Паўла Шарамета. Вядома, што выбухоўку пад аўто журналіста заклалі дзве асобы – мужчына 168-175 сантыметраў росту з «іспанскай» бародкай і жанчына, якая на 5 сантыметраў ніжэй за мужчыну. Муж і жонка Грышчанкі сапраўды выглядаюць падобнымі на гэтае апісанне.
Паўла Шарамета забілі 20 ліпеня 2016 году ў цэнтры Кіева. У ягоным аўтамабілі на скрыжаванні вуліцаў Івана Франка і Багдана Хмяльніцкага выбухнула самаробная бомба з элементамі супрацьпяхотнай міны. Журналіст памёр за лічаныя хвіліны. Была распачатая крымінальная справа п.5 ч.2 арт.115 КК Украіны (наўмыснае забойства здзейсненае спосабам, небяспечным для жыцця многіх асобаў.
СК belsat.eu