Ва Украіне працягваецца расследаванне справы баевіка ЛНР, які заяўляў пра супрацу з КДБ


Сергей Трафімаў на Данбасе. Фота з сацыяльных сетак

Як стала вядома belsat.eu, украінскія праваахоўныя органы працягваюць расследаванне крымінальнай справы адносна беларускага грамадзяніна, былога баевіка ЛНР Сяргея Трафімава. Сам Трафімаў цяпер знаходзіцца на свабодзе – не выключана, што на тэрыторыі Беларусі.

4 студзені 2017 года на сайце беларускай службы Радыё Свабода выйшла інтэрв’ю былога баевіка ЛНР, ураджэнца Віцебску 33-гадовага Сяргея Трафімава. У пачатку 2000-х Трафімаў быў актывістам «Зубра» і сябрам Аб’яднанай грамадзянскай партыі. У 2014 годзе ён з’ехаў ваяваць за ЛДНР, трапіў у батальён «Русь». Паводле ягоных словаў, падчас вайны ён забіў дзясяткі чалавек. Па вяртанні з Данбасу, як сцвярджаў Трафімаў, яго выклікалі на размову ў КДБ, дзе ён прапанаваў чэкістам свае паслугі ў якасці інтэрнэт-троля.

«Я ім сам прапанаваў. У мяне проста авантурны характар, самому ўсё цікава. Спытаўся: я ж блогер, ці я чымсьці магу быць карысны?.. Ну добра, сказалі, вось табе пару квэстаў – ср…(спрачацца. – ) з апазіцыяй, з прадпрымальнікамі, стварыць дзесяць фэйкавых старонак і пісаць каментары. Троліць то бок. Я зрабіў, што прасілі. Потым пытаюся: чым магу быць яшчэ карысны?.. Спачатку перапісваліся мы праз «Вконтакте», потым яны памянялі гэбэшніка, які мной апекаваўся, – перапіска пайшла праз пошту mail.ru», – распавядаў Трафімаў у інтэрв’ю, якое было дадзена журналісту Радыё Свабода ў Віцебску.

Адразу пасля публікацыі інтэрв’ю, 11 студзеня, пракуратура Луганскай вобласці абвесціла: з нагоды інфармацыі, якая з’явілася ў СМІ, распачатае следства паводле ч. 5 арт. 260 Крымінальнага кодэксу Украіны (удзел у незаконных узброенных фармаваннях, што пацягнула за сабою гібель людзей).

Як высветліў belsat.eu, следства адносна Сяргея Трафімава працягваецца.

«Следчымі следчага аддзялення Новаайдараўскага аддзелу паліцыі Галоўнага ўпраўлення Нацыянальнай паліцыі ў Луганскай вобласці распачатае і здзяйсняецца дасудовае расследаванне ў крымінальнай вытворчасці па факце выяўленай у прасторах інтэрнэту інфармацыі адносна мужчыны, які ваяваў у складзе незаконных узброеных фармаванняў на Данбасе, з прыкметамі крымінальнага злачынства, прадугледжанага ч.5 арт. 260 Крымінальнага кодэксу Украіны. На дадзены момант дасудовае расследаванне па гэтай крымінальнай вытворчасці працягваецца, выконваюцца неабходныя следчыя і вышуковыя дзеянні. Канчатковае рашэнне ў крымінальнай вытворчасці на цяперашні час не прынятае, разам з тым, здзяйсняюцца ўсе неабходныя захады, скіраваныя на поўнае, хуткае і непрадузятае расследаванне. Ход расследавання кантралюецца Новаайдараўскім аддзелам Севераданецкай гарадской пракуратуры Луганскай вобласці», – адзначаецца ў адказе Севераданецкай пракуратуры на запыт «Белсату».

У дакуменце не тлумачыцца, ці накіроўвалі праваахоўныя органы Украіны запыт на выдачу Сяргея Трафімава і ці праводзіліся з ім на тэрыторыі Беларусі нейкія следчыя дзеянні.

Мяркуючы па старонцы Сяргея Трафімава «Вконтакте», экс-баявік знаходзіцца на свабодзе і рэгулярна карыстаецца сацыяльнымі сеткамі. З фотаздымкаў «Вконтакте» можна зрабіць выснову, што пасля таго, як украінскія следчыя распачалі супраць яго справу, Трафімаў неаднойчы адзначаўся на тэрыторыі Беларусі. Не выключана, што ён тут стала жыве – прынамсі, у статусе гораду прыжыванне ў сацсетцы пазначаны Віцебск.

Скрыншот старонцы Сяргея Трафімава “Вконтакте”

Адзначым, што праваахоўныя органы Беларусі зняпраўджвалі заявы Трафімава, зробленыя ў інтэрв’ю Радыё Свабода ў студзені 2017 года. Як сцвярджалі сілавікі, потым на допыце ў КДБ Трафімаў адмовіўся ад словаў, сказаных журналістам – ён заявіў, што хлусіў наконт актыўнага ўдзелу ў баявых дзеяннях і супрацы з органамі дзяржбяспекі «дзеля надання сябе значнасці». У сувязі з гэтым баевіку была прызначана судова-медычная экспертыза. Пры гэтым беларускія спецслужбы пацвердзілі, што Трафімаў сапраўды прапаноўваў свае паслугі КДБ, аднак чэкісты нібыта адмовіліся. Таксама праваахоўнікі пацвердзілі, што Трафімаў служыў у фармаваннях ЛНР, аднак адзначылі, што ён дэ-факта не ваяваў, а пераважна рамантаваў танкі ды нёс вартавую службу аховы вайсковых аб’ектаў. Падставаў да прыцягнення Трафімава да крымінальнай адказнасці беларускія сілавікі не знайшлі.

«Мяне беларускія ўлады не выдадуць». Чаму неанацыст, якога вінавацяць у ваенных злачынствах, бесперашкодна наведвае Беларусь?

Ігар Ільяш, belsat.eu

Глядзі таксама
Каментары