Чакаць няма часу. ЮНІСЭФ і BYCOVID-19 аб’ядналі намаганні ў збіранні грошай для лекараў. Ілюстратыўны здымак pixabay.com
«У нашай каманды ёсць унікальная магчымасць закупіць і даставіць у Беларусь найбуйнейшую партыю медычнага абсталявання і матэрыялаў, што мы можам арганізаваць у супрацы з лагістычным хабам UNICEF у Капенгагене. Груз будзе мець асаблівы статус у межах сістэмы ААН ЮНІСЕФ, таму не будзе абкладацца падаткамі і мытнымі зборамі пры ўвозе ў Беларусь», – гаворыцца ў лісце.
На працягу 6 тыдняў арганізацыя можа транспартаваць больш за 1,5 млн літраў антысептыкаў і сродкаў асабістай гігіены, больш за 100 тысяч тэст-сістэмаў, прыбораў дыстанцыйнага вымярэння тэмпературы, сродкаў індывідуальнай абароны і шмат іншага.
Гэты спіс распрацавалі эксперты арганізацыі разам з адмыслоўцамі профільных беларускіх установаў.
UNICEF – не адзіная арганізацыя, якая збірае грошы на дапамогу медыкам. Беларускае прадстаўніцтва аб’яднала сілы з найбуйнейшым зборам #BYCOVID-19.
«Дзякуючы магчымасцям UNICEF наша сумесная ініцыятыва мае выйсце на сусветны рынак пастаўляльнікаў, а дзякуючы базе заяваў медыкаў і лагістычнай валанцёрскай сетцы #BYCOVID19 дапамога медыкам будзе дакладнай, актуальнай і своечасовай», – напісаў каардынатар кампаніі Андрэй Стрыжак на сваім профілі ў Facebook.
Кааперацыя з рознымі грамадскімі ініцыятывамі дапаможа зрабіць больш для беларускіх дактароў, мяркуюць у UNICEF.
«У цяперашняй сітуацыі ўзаемная канкурэнцыя вядзе да перамогі каронавiрусу над людзьмі. Таму мы гатовыя выкарыстоўваць усе магчымасці дзеля таго, каб працаваць разам з ініцыятывамі, якія маюць задачу дапамагаць дактарам і пацыентам», – падкрэслілі ў арганізацыі.
Удзельнічаць у зборы UNICEF можна праз сістэму АРІП ці праз плацежную картку.
Падтрымаць кампанію #BYCOVID-19 можна на сэрвісе MolaMola. Калі вы не жывяце ў Беларусі, ужывайце PayPal або іншы з прапанаваных спосабаў.
КТ Belsat.eu