Ультрагук не дапамог. У папулярнай беларускай блогеркі выявілі рак

У жонкі вядомага хакеіста і трэнера, фатографкі ды Instagram-блогеркі Надзеі Мялешкі знайшлі рак грудзей трэцяй стадыі. Хваробу не ўдалося своечасова выявіць нават на рэгулярным УГД малочнай залозы.

Пра захворванне Надзея Мялешка паведаміла ў сваім Instagram, у якога больш за 78 тыс. падпісчыкаў. Калі мы звязаліся з жанчынаю, яна якраз была на хіміятэрапіі ў РНПЦ анкалогіі і медычнай радыялогіі імя М.М. Аляксандрава ў Бараўлянах.

https://www.instagram.com/p/B8rMrZhpk6J/

Па словах суразмоўцы, апошняе УГД яна рабіла некалькі месяцаў таму, і ўсё было добра. Але затым яна сама знайшла пухліну. У выніку 8 студзеня ёй паставілі дыягназ – рак грудзей 3-й стадыі.

«Пухліну не выявілі тры месяцы таму на УГД, бо гэта такі агрэсіўны від пухліны. Яна рэзка вырастае і хутка развіваецца. Ні УГД, ні дактары не могуць гэта ўбачыць. Такі від пухліны – ён нясе генетычны характар», – адзначыла Надзея Мялешка ў размове з карэспандэнтам belsat.eu.

Жанчына прызнаецца: пасля хіміятэрапіі цяжка – «гэта не вітамінчыкі калоць». Але аптымізму яна не губляе, хоць і разумее, што наперадзе «цяжкі год змагання».

https://www.instagram.com/p/B8x7ZFApOw0/

Што можа паўплываць на рак?

Вядомы беларускі анколаг-мамолаг Леанід Путырскі, які да таго ж мае ўласны Youtube-канал, дзе распавядае пра прафілактыку і лекаванне раку грудзей, у размове з карэспандэнтам «Белсату» назваў згаданы выпадак незвычайным. Пры гэтым ён даў шэраг рэкамендацыяў для прафілактыкі захворвання. Перадусім доктар параіў памятаць, што здароўе чалавека закладаецца з дзяцінства. Паводле яго, сярод таго, што можа паўплываць на малочную залозу: спадчыннасць, нервовы ды гарманальны фактары, імунітэт, харчаванне і экалогія.

Мамолаг Леанід Путырскі. Фота https://www.facebook.com/leonid.putyrski

У гарманальным фактары для меншай рызыкі развіцця раку малочнай залозы Леанід Путырскі заклікаў нараджаць першае дзіця ў 20-25 гадоў. Пры гэтым карміць дзіця грудзьмі варта не менш за год, а то і да двух гадоў, паводле рэкамендацыяў САЗ, адзначыў суразмоўца. Таксама, паводле яго, трэба, каб у жанчын не было мастытаў і абортаў.

«Больш абортаў – большая рызыка раку малочнай залозы», – дадаў спецыяліст.

Паўплываць на малочную залозу можа таксама шчытападобная. Яшчэ Леанід Путырскі раіць старацца пазітыўна ставіцца да жыцця, каб зменшыць уплыў нерваў на здароўе. У выпадку цяжкіх сітуацыяў доктар рэкамендуе піць заспакаяльныя сродкі, пажадана натуральныя.

Не наРАКай, альбо перамога над смерцю

«Калі чалавек пазітыўна жыве, а другі – негатыўна, нават пры адным і тым жа стане ў іх будуць розныя перспектывы адносна здароўя», – падкрэсліў ён.

Спрыяе меншай колькасці праблемаў са здароўем таксама добры імунітэт, а развіццю анкалогіі – шкодная экалогія, ужыванне алкаголю ды цыгарэтаў, бо «прадукты распаду пры курэнні, усмактваючыся ўнутр, псуюць працэсы стрававання і могуць з’яўляцца шмат якія пухліны», дадаў ён.

У харчаванні Леанід Путырскі раіць сачыць за як мага большай натуральнасцю прадуктаў. Апроч таго, варта менш ужываць бытавую хімію (у тым ліку пры мыцці посуду, асвяжэнне паветра – «гэта тое самае, што курыць»), ненатуральныя крэмы, шампуні, гелі, зубныя пасты.

Дыягностыка і лекаванне

Што датычыць ранняй дыягностыкі, то Леанід Путырскі раіць не злоўжываць рэнтгенаўскім выпраменьваннем і камп’ютарнай тамаграфіяй – «толькі там, дзе трэба». Пры гэтым жанчынам трэба самім аглядаць сябе.

«Кожны тыдзень пасля месячных, ці, калі няма месячных, проста ў новы месяц – сачыць за сваймі грудзьмі. Агледзець вокам і рукамі прамацаць», – сказаў ён.

Да 40 гадоў трэба раз на год, а пасля 40 – раз на паўгода наведваць доктара і рабіць УГД. Мамаграфію трэба рабіць з 50 гадоў, але не часцей за раз на два гады, бо «гэта таксама апраменьванне».

«І, канечне, калі любая жанчына нешта ў сябе знайшла, яна павінна імгненна – дзень-два-тры – быць у доктара, каб паказацца. Хай лепш памылковая трывога, чым прапусціць, а пасля шкадаваць», – дадаў доктар.

Разам з тым Леанід Путырскі прызнае, што праз вялікія чэргі да анколагаў людзі могуць чакаць першай кансультацыі месяц-паўтара. Ён спадзяецца, што з новым міністрам, які сам з’яўляецца анколагам, гэтую сітуацыю атрымаецца выправіць.

https://belsat.eu/news/z-prablemayu-pakul-ne-spravimsya-mamolag-leanid-putyrski-pra-toe-chamu-belaruski-usyo-chastsej-hvareyuts-na-rak-malochnae-zalozy/

Даведка

  • У 2019 года ў Беларусі было выяўлена 49,9 тыс. новых выпадкаў анкалагічных захворванняў. У мужчынаў часцей за ўсё выяўлялі рак прадсталёвай залозы, лёгкага, каларэктальны рак. У жанчын – рак малочнай залозы, каларэктальны рак і рак маткі. На дыспансерным уліку летась было 318 тыс. чалавек, з іх пяць гадоў і больш – 160 тыс., або 51 %.
  • За 2019 год 75 тыс. жанчын прайшлі скрынінг на рак малочнай залозы, што на 24 % больш, чым у 2018 годзе. Рак выяўлены ў 0,5 % выпадкаў, у 379 чалавек. У 344 жанчын – на нулявой, першай і другой стадыях. На рак прадсталёвай залозы абследаваліся 138 тыс. мужчынаў. У 884 чалавек знайшлі анказахворванні, у 80,7 % выпадкаў – на першай і другой стадыях. На каларэктальны рак абследаваныя 30 тыс. чалавек, ён дыягназаваны ў 81 выпадку. У 82 % пацыентаў – на ранніх стадыях.
  • Паводле даследавання «Актуальныя пытанні жаночага здароўя», менавіта рака малочнай залозы больш за ўсё баяцца беларускія жанчыны. На другім месцы стаіць рак цела маткі, на трэцім – рак шыйкі маткі.
  • 80 % пухлінаў грудзей жанчыны выяўляюць самастойна. Але далёка не ўсе з іх адразу ж звяртаюцца да спецыялістаў. У выніку ў 20-30 % жанчын захворванні выяўляюцца позна, у 20 % пераходзяць у хранічную форму.

МГ belsat.eu

Hавiны