Як паведаміла belsat.eu жонка Някляева Вольга, цяпер ён знаходзіцца ў ізалятары на Акрэсціна.
Паводле яе словаў, Някляева затрымалі пры выхадзе з дому, але ён паспеў патэлефанаваць.
«Пасля яго адвезлі ў Ленінскі РУУС, запоўнілі нейкія паперы і павезлі ў ізалятар», – сказала яна.
Імаверна, Някляева пратрымаюць там 10 содняў – раней да адміністратыўнага арышту яго прысудзілі за ўдзел у «Маршы абураных беларусаў. 2.0», які адбыўся яшчэ ў кастрычніку.
Пра стан здароўя Някляева на дадзены момант звестак няма. Заўтра да яго пойдзе адвакат. Цяпер Вольга Някляева збірае перадачу з неабходнымі лекамі.
Сын Вячаслава Сіўчыка Вітаўт паведаміў, што ягоны бацька цяпер таксама ў ЦІП на Акрэсціна. Паводле папярэдняй інфармацыі, Сіўчык будзе адбываць 5 содняў арышту, якія яму прысудзілі мінулай восенню.
Нагадаем, 21 сакавіка ў Менску затрымалі ініцыятараў шэсця на 25 сакавіка – Вячаслава Сіўчыка і Максіма Вінярскага.
КА, belsat.eu
