Новазаводскі раённы суд Чарнігава вызваліў з-пад варты грамадзяніна Беларусі Юрыя Палітыку, абвінавачанага ва Украіне ў зборы сакрэтнай інфармацыі.
Адпаведнае рашэнне было ўхваленае 3 кастрычніка, паведамляе радыё «Свабода». 4 кастрычніка ў Жытоміры мае адбыцца сустрэча кіраўнікоў Беларусі і Украіны Аляксандра Лукашэнкі і Уладзіміра Зяленскага.
Палітыка вызвалены пад асабістыя абавязацельствы. Разам з тым судовы працэс для разгляду ягонай справы будзе працягвацца, і ён мусіць з’яўляцца на паседжанні на выклік суда. Пры гэтым Палітыка, паводле адваката, «можа жыць, дзе хоча, з правам выезду, куды хоча».
Паводле версіі следства, Палітыка «ініцыятыўна ўсталяваў кантакт» з украінскім вайскоўцам Дзмітрыем Острыкам і ад яго атрымаў аэраздымкі зоны АТА і зашыфраваную мапу са схемай наступальнай аперацыі «Шторм», якую Узброеныя сілы Украіны планавалі правесці супраць ДНР у кірунку Новаазоўска 8-12 ліпеня 2017 году. Гэты файл у мабільным тэлефоне Палітыкі знайшлі супрацоўнікі СБУ пры затрыманні ў памежным пункце «Новыя Ярылавічы» летась 16 чэрвеня. Следства лічыць, што беларус збіраўся перадаць звесткі «неўстаноўленай дзяржаве». Беларусь і яе спецслужба КДБ пры гэтым не называюцца.
Палітыка сцвярджае, што яго «падставілі» і ён не збіраў ніякай сакрэтнай інфармацыі, абвінавачванне ў шпіянажы і на карысць Беларусі, і на карысць Расеі ён абвяргае. У сваім лісце ў беларускую амбасаду Палітыка распавёў пра катаванні з боку ўкраінскіх сілавікоў: яго нібыта душылі, нацягвалі торбу на галаву, «ладзілі паказальны расстрэл», вывозілі ў лес. Усё гэта, па словах Палітыкі, прымусіла яго агаварыць сябе. Аднак СБУ зняпраўдзіла звесткі аб катаваннях. Амаь адначасова Генпракуратура Беларусі назвала справу «палітычнай».
Раней некаторыя ўкраінскія эксперты выказвалі меркаванне, што працэс над Палітыкай можа быць адлюстраваннем суду над журналістам Украінскага нацыянальнага радыё Паўлам Шаройкам, якога затрымалі ў Менску ў кастрычніку 2017 года і абвінавацілі ў шпіянажы.
МГ belsat.eu
