Чарговыя паведамленні пра страляніну са шматлікімі ахвярамі прыйшлі са Злучаных Штатаў. Гэта трэці выпадак за содні. Гэтым разам стралялі ў Чыкага.
Як паведамляе «NBC Chicago», ноччу 4 жніўня група людзей стаяла ў мясцовым парку, каля па іх пачалі страляць з аўтамабіля.
У выніку былі параненыя сем чалавек. 21-гадовы мужчына, якога паранілі ў пахвіну, зараз знаходзіцца ў цяжкім стане. Усім пацярпелым ад 19 да 25 гадоў.
Раней сёння паведамлялася пра страляніну ў гарадах Эль-Паса (штат Тэхас) і Дэйтан (штат Агаё).
У Эль-Паса загінулі прынамсі 20 чалавек і 24 атрымалі раненні. Інцыдэнт адбыўся ў супермаркеце «Walmart». Нападнік затрыманы.
А ў Дэйтане невядомы пачаў страляніну каля аднаго з гарадскіх бараў. Загінулі мінімум дзевяць чалавек, 26 атрымалі раненні. Нападніка застрэліла паліцыя.
МГ belsat.eu