Паводле пацярпелых ад залевы жыхароў, ЖЭУ не складае актаў заліцця. Ва ўстанове кажуць, што нічога страшнага няма.
Ноччу 16 ліпеня ў Віцебску ішоў моцны дождж, у выніку чаго затапіла пяць кватэраў у доме па праспекце Люднікава 16/1. І вось ужо паўмесяцы людзі не могуць дабіцца ад мясцовага ЖЭУ №14 складання акту заліцця.
«А 3:00 уначы пачало крапаць паміж плітамі з тэхнічнага паверху. Спачатку проста крапала. Я спусціўся да суседкі на 11-ты паверх, каб папярэдзіць, што ў яе таксама хутка пацячэ, а калі вярнуўся ў сваю кватэру, то вада ўжо цякла па сценах», – узгадвае здарэнне Руслан Сабчук, жыхар кватэры №203, што месціцца на апошнім 12-ым паверсе шматпавярховіку.
Руслан выклікаў аварыйную службу, але тая не прыехала – бо была ноч. Тады ён патэлефанаваў па нумары 115 – у адзіную дыспетчарскую службу ЖКГ. Аднак там таксама сказалі, што зараз ніхто не прыедзе, па той жа самай прычыне: ужо ноч. Але заяўку прынялі і параілі пачакаць раніцы, калі прыйдуць спецыялісты з ЖЭУ.
Гаспадару нічога не засталося, як толькі ратаваць сваю кватэру самастойна. Мужчына адправіў сям’ю да сваякоў, а сам разам з цешчаю пачаў выціраць ваду ды падстаўляць розныя ёмістасці, каб вада не цякла наўпрост на падлогу і мэблю.
«Раніцай цешча пайшла ў ЖЭУ, але гэта выніку не дало, ніхто да нас не прыйшоў. У кватэры пачало яшчэ больш цячы. Тады я сам схадзіў у ЖЭУ №14 і напісаў заяву, якую зарэгістравалі. Каля 11.00 да нас прыйшлі камунальнікі», – распавядае Руслан Сабчук.
Мужчыне патлумачылі, што ў доме забілася ліўневая каналізацыя. Супрацоўнікі ЖЭУ №14 ліквідавалі прычыну затаплення, а ваду з тэхнічнага паверху злілі наўпрост Руслану ў кватэру. Пасля гэтага затопленымі аказаліся кватэры з 12-га па 8-мы паверх. То бок залітымі апынуліся ажно пяць кватэр па аднаму стаяку. І толькі каля абеду 16 ліпеня ў кватэрах амаль перастала крапаць.
У выніку затаплення ў кватэры Руслана Сабчука адклеіліся шпалеры, пажаўцела столь, разбухла падлога ды мэбля. І паколькі затапленне адбылося не па віне жыльцоў дому, яны маюць права на кампенсацыю. Паводле Пастановы Савету Міністраў Рэспублікі Беларусь ад 21 траўня 2013 г. №399 «Аб зацверджанні правілаў карыстання жылымі памяшканнямі, утрымання жылых і дапаможных памяшканняў» для гэтага неабходна, каб супрацоўнікі ЖЭУ перш-наперш у дзень выяўлення здарэння склалі акт заліцця кватэры, а потым, не пазней за 20 дзён, – дэфектны акт. Аднак гэта чамусьці да сённяшняга часу так ніхто і не зрабіў.
«Колькі дзён я званіў у ЖЭУ №14 і пытаўся, калі яны прыйдуць скласці акт заліцця маёй кватэры, але мне казалі, што вядучага інжынера цяпер няма, а ў ЖЭУ пакуль багата работы ў іншых дамах», – наракае на сітуацыю Руслан Сабчук.
«Белсат» звярнуўся наўпрост у ЖЭУ №14, каб яны самі пракаментавалі гэткую сітуацыю. Апынулася, праблема датычыць не толькі гэтага дому.
«У нас было 79 зваротаў па заліцці. А ў нас два майстры і адзін вядучы інжынер, менавіта яны ідуць на абследаванні, прыйдуць і да вас таксама. Няма нічога страшнага. Калі факт заліцця быў, яны прыходзяць, абследуюць і складаюць [акт. – Belsat.eu] у любым выпадку», – распавялі «Белсату» у ЖЭУ №14.
Віцебская праваабаронца Ірына Траццякова ў гэткіх дзеяннях ЖЭУ №14 бачыць яўнае парушэнне правоў грамадзянаў:
«Паводле дзейнага заканадаўства акт заліцця кватэры складаецца неадкладна з моманту выяўлення. Так, цяпер камунальнікі самастойна страхуюць кватэры на апошніх паверхах дамоў. Аднак нясвоечасовае складанне акту заліцця кватэры ў далейшым можа паўплываць на памер страхавой кампенсацыі. У дадзенай сітуацыі я раю жыльцам у пісьмовай форме звярнуцца ў абʼяднаны ЖРЭТ гораду Віцебску і прапанаваць развязаць пытанне ў дасудовым парадку», – тлумачыць праваабаронца.
На думку Руслана Сабчука, неўзабаве іх можа затапіць зноў, бо літаральна праз тры дні пасля здарэння пайшоў моцны дождж, і на калідоры побач з кватэрай са швоў у плітах столі закрапала вада.
Віктар Старавойтаў Belsat.eu