Грамадзяне Беларусі і Украіны сабраліся тут – каля расейскай амбасады ў Варшаве, каб падтрымаць Кірылу Сілівончыка. Месяц таму расейскі суд прысудзіў яму два гады зняволення за праяву салідарнасці з Украінай.
Салідарнасць палягала на тым, што маладзён, які працаваў на расейскім абаронным заводзе, размясціў у сваім акаўнце ў інтэрнэце шэраг патрыятычных беларускіх і ўкраінскіх матэрыялаў.
Гэткая салідарнасць вельмі патрэбная Кірылу. Арганізатарамі пікету выступілі рух салідарнасці «Разам» і «Еўрамайдан Варшава». Удзельнікі заклікалі ўлады Расеі вызваліць Кірылу Сілівончыка.
ВЯЧАСЛАЎ СІЎЧЫК, РУХ «РАЗАМ», АРГАНІЗАТАР АКЦЫІ:
«Вельмі хацелася б, каб гэтая акцыя дапамагла Беларусі і беларусам наладзіць нармальную кампанію ў абарону Кірыла Сілівончыка, уся віна каторага толькі ў тым, што Пуцін пачаў вайну ў Украіне».
Кірылу Сілівончыка арыштавалі летась 18-га снежня. Месяц таму Маскоўскі акруговы суд прысудзіў яму 2 гады зняволення ў калоніі-паселішчы. У перапосце пра падтрыманне Украіны расейскія ўлады пабачылі публічны заклік да тэрарызму.
РАМАН КОРБУТ, «ЕЎРАМАЙДАН ВАРШАВА»:
«Ён ніколі не быў ва Украіне, але ён за яе выступаў. Я ніколі не быў у Беларусі, але калі я гляджу на гэтых апазіцыянераў, я адчуваю іх любоў да іх краіны. І для мяне Беларусь стала вельмі роднай дзяржавай».
Не пакінулі без увагі і грамадзянаў Украіны, якія таксама застаюцца ў Расеі пад вартаю, гэта лётчыца Надзея Саўчанка, кінарэжысёр Алег Сянцоў і Мікола Карпюк, адзін з лідараў нацыяналістычнай арганізацыі УНА-УНСО.
РАМАН КОРБУТ, «ЕЎРАМАЙДАН ВАРШАВА»:
«Вызваляйце палітвязняў! І, калі ласка, лічыцеся з тым, што Украіна і Беларусь – гэта незалежныя дзяржавы».
Пікетоўцы не выключаюць, што да Сілівончыка маглі прымяняць карныя метады, каб змусіць прызнаць віну.
Таксама прысутныя заклікалі ўлады Беларусі этапаваць маладзёна на радзіму і вызваліць паводле амністыі. Але беларускі бок на гэтыя заклікі не рэагуе. Як не рэагуюць і расейскія дыпламаты, якія за час акцыі гэтак і не выйшлі да людзей.
Акрамя праявы салідарнасці акцыя каля брамы амбасады для нас беларусаў адметная і павагай да грамадзянскіх правоў. Мясцовыя праваахоўнікі ўважліва назірали, але не перашкаджалі канстытуцыйнаму праву на свабоднае выказванне меркавання.
Ганна Аземша, belsat.eu
