З цягніка, на якім журналістка «Белсату» ехала ў Вільню, вывелі ўсіх пасажарыў

Абноўлена: «выбухоўка» аказалася патайніком для цыгарэтаў.

Пасля памежнага кантролю на беларуска-літоўскай мяжы пасажыраў цягніка вывелі з вагонаў. Памежнікі заявілі, што ў цягніку знайшлі «выбухоўку».

16 верасня пасажыраў цягніка «Менск – Вільня» высадзілі на станцыі Гудагай у сувязі з замініраваннем.

«Цягнік «Менск – Вільня», на якім я еду, затрымалі па тэхнічных прычынах. Высадзілі ўсіх пасажыраў. Спачатку вывелі ўсіх пасажыраў з майго вагону, потым яшчэ з аднаго, а потым – увесь цягнік», – паведаміла Чайчыц рэдакцыі.

Паводле журналісткі, на месца прыбылі ратаўнікі, «хуткія», міліцыянты ў бронекамізэльках. Аперацыя распачалася пасля праверкі дакументаў на станцыі «Гудагай». Ані памежнікі, ані праваахоўнікі не каментуюць сітуацыю. Пасажырам паведамілі, што іх адправяць на наступным цягніку.

Міліцыянт у бронекамізэльцы на месцы здарэння яшчэ да даго, як пасажыраў вывелі з вагонаў. Фота – Вольга Чайчыц / Белсат

Пазней памежнікі распавялі, што ў адным з вагонаў знайшлі скрыню з выбухоўкай. Цягнік адцягнулі ад станцыі.

Пасажыры цягніка «Менск – Вільня» на станцыі Гудагай. Фота – Вольга Чайчыц / Белсат

Пасля гэтага людзям сказалі, што наступны цягнік таксама «затрымліваецца».

«Сказалі, што наступны цягнік будзе не хутка. Чакаюць спецыялістаў з Менску ці Горадні», – распавядае Чайчыц.

Нашая калега дадае, што не ведае дакладна, ці затрыманне цягніка звязанае з тым, што яна ехала на ім.

Пасажыры не ведаюць, калі яны працягнуць паездку. Фота – Вольга Чайчыц / Белсат

Журналістку Вольгу Чайчыц, якая супрацоўнічае з нашым каналам, улады кожны месяц штрафуюць за гэтую супрацу. Агульная сума сёлетніх штрафаў склала ўжо Br 8330 – і працягвае расці.

У аўторак судовая выканаўца паведаміла Чайчыц аб абмежаванні выезду з краіны – беспадстаўным, бо ўсе штрафы журналістка своечасова аплочвае.

У сераду дзякуючы ўмяшанню юрыдычнага аддзелу Беларускай асацыяцыі журналістаў, судвыканаўца была вымушаная адклікаць забарону на выезд.

Суддзя Дзяржынскага суда падцвердзіла, што Вольга Чайчыц свабодная ў праве перамяшчэння.

На наступным тыдні ў Вольгі Чайчыц запланаваныя сустрэчы ў Брусэлі – ў Еўрапарламенце і Еўракамісіі, і ў Парыжы – з Міжнароднай федэрацыяй журналістаў і «Рэпарцёрамі без межаў» адносна сітуацыі са свабодай медыяў ў Беларусі.

«Паспрабую дабрацца да Вільні аўтаспынам ці на таксоўцы, але не ведаю, ці паспею на самалёт», – дадае Вольга.

ДД