На сайце Інстытуту нацыянальнай памяці Польшчы апублікавана заява пра перагляд ацэнак дзеянняў палявога камандзіра Рамуальда Райса (Бурага). МЗС Беларусі адрэагаваў на гэтыя крокі.
Паводле прэс-сакратара МЗС Беларусі Анатоля Глаза, сітуацыя выклікае заклапочанасць у беларускіх дыпламатаў.
«Злачынца, асабіста аддаваў загад і ўдзельнічаў у забойстве мірных жыхароў беларускіх вёсак на Падляшшы, не можа быць абелены ні ў вачах беларусаў, ні ў гістарычнай памяці іншых людзей. Польскімі навукоўцамі сабрана дастаткова доказаў яго злачынстваў. На аснове фактаў, а не тэарэтычных разважанняў, зробленыя адпаведныя высновы следства камісіі Інстытуту нацыянальнай памяці ў 2005 годзе», – адзначыў прэс-сакратар.
Для дачы адпаведных тлумачэнняў у МЗС Беларусі выкліканы пасол Польшчы.
«Нашу асаблівую заклапочанасць выклікаў адкрыты цынізм асобных польскіх «даследчыкаў», на высновы якіх абапіраецца заява ІНП. У прыватнасці, у яго апраўданне яны канстатуюць, што Буры меў магчымасць «спаліць не пяць, а значна больш беларускіх вёсак у павеце Бельск-Падляскі». Мы чакаем ад уладаў Польшчы публічных афіцыйных каментароў наконт таго, ці з’яўляецца такая ацэнка дзеянняў Бурага афіцыйным пунктам гледжання і наколькі гэта суадносіцца з крокамі па выбудоўванні дыялогу, у тым ліку гістарычнага, якія былі зроблены бакамі ў апошні час», – дадаў Анатоль Глаз.
СК, belsat.eu