Паводле Белстату ў перапісе насельніцтва Беларусі па стане на раніцу 12 кастрычніка прынялі ўдзел больш за два з паловаю мільёны чалавек.
Яшчж ўчора мы паведамлялі пра тое, што ў перапісе насельніцтва ў Беларусі прынялі ўдзел 2,3 млн чалавек. А на раніцу 12 кастрычніка перапісаліся ўжо 2504,2 тыс. чалавек. Расце і колькасць грамадзянаў краіны, якія праходзяць перапіс праз інтэрнэт – такіх цяпер 947 тысячаў чалавек.
Згодна з статыстыкі Белстату, на Берасцейшчыне ўдзел у перапісе прынялі 358 тысячаў чалавек, на Віцебшчыне – 297 тысячаў, у Гомельскай вобласці – 382 тысячы. На Гарадзеншчыне – 320, а на Магілёўшчыне пакуль 236 тысячаў.
Лідарам па колькасці асобаў, якія прынялі ўдзел у перапісе, з’яўляецца Менская вобласць – 493 тысячы чалавек.
Нагадаем, «Белсат» падчас перапісу насельніцтва ладзіць кампанію «Беларускамоўны». Дэвіз акцыі – пазнач роднай моваю беларускую. Справа ў тым, што ў анкеце – 49 пытанняў, адно з галоўных – пад нумарам 12 – якая мова для грамадзянаў родная. Таму наш тэлеканал заклікае пазначаць у гэтым адказе беларускую мову.
Да кампаніі таксама далучыліся Беларускі ПЭН-цэнтр, «Арт Сядзіба», крамы «Symbal.by» і «ЛСТР», Згуртаванне беларусаў свету «Бацькаўшчына» і кампанія «Будзьма беларусамі!»
Перапіс насельніцтва распачаўся 4 кастрычніка. Завершыцца мерапрыемства 30 кастрычніка. Паўдзельнічаць у ім можна онлайн.
СК belsat.eu
